काठमाडौ, माघ ११ – कप्तान पारस खड्का विश्व क्रिकेट लिग डिभिजन-२ प्रतियोगिताकै म्यान अफ द सिरिज चुनिएका छन्। नामिबियामा शनिबार सम्पन्न प्रतियोगिता केन्यासँग हारेपछि नेपाल चौथो भएसँगै पारसलाई सर्वोत्कृष्ट खेलाडीको पुरस्कार दिइएको हो।
कान्तिपुरमा समाचार छ। पारस नेपालले नामिबिया र क्यानडालाई हराएको खेलमा म्यान अफ द म्याच भएका थिए। ती दुवै प्रतिद्वन्द्वी विश्वकप खेलिसकेका टिम हुन्। अन्तर्राष्ट्रिय क्रिकेट परिषद् (आईसीसी) ले आयोजना गर्ने प्रतियोगिताको प्रत्येक खेलमा म्यान अफ द म्याच हुनेले ३ अंक पाउँछन्। त्यसपछिका २ उत्कृष्टलाई क्रमशः २ र १ अंक दिइन्छ।
नामिबिया र क्यानडासँगको खेलमा ६ अंक जोडेका पारसले नामिबियासँगको खेलमा २ अंक पाएका थिए। उनी सर्वाधिक ८ अंकसहित प्रतियोगिताकै सर्वोत्कृष्ट खेलाडीका रूपमा ‘म्यान अफ द सिरिज’ चुनिएका हुन्। सुरुका चार खेलबाटै उनको म्यान अफ द सिरिजमा पकड बलियो भएको थियो। उनले विश्व क्रिकेट लिगमा १ हजार रन पनि यही प्रातियोगितामा पूरा गरेका थिए।
विश्व क्रिकेट लिगका खेलहरूमा म्यान अफ द सिरिजको पुरस्कार पाउने पारस तेस्रो नेपाली हुन्। सन् २००८ मा जर्सीको डिभिजन-५ मा १९ विकेट लिँदै महबुब आलम र मलेसियामा २०१२ मा भएको डिभिजन-४ मा २१ विकेट हात पार्दै वसन्त रेग्मी म्यान अफ द सिरिज घोषित भएका थिए।
केन्याविरुद्ध शनिबार पहिलो बलमै आउट भए पनि पारसले प्रतियोगितामा १ सय ८५ रन बनाउनुका साथै ६ विकेट लिएर अलराउन्ड प्रदर्शन गरेका थिए। उनी २०१२ मा एसीसी ट्रफी इलिटमा नेपाललाई आयोजक यूएईसँगै संयुक्त विजेता हुँदा प्रतियोगिताको उत्कृष्ट खेलाडी भएका थिए। उनी २०१३ मा काठमाडौंमा भएको एसीसी ट्वान्टी-कपमा पनि म्यान अफ द सिरिज भएका थिए। त्यसमा नेपाल फाइनलसम्म पुगेको थियो।
डिभिजन-२ मा ज्ञानेन्द्र मल्लले नेपालका लागि सर्वाधिक २ सय ३६ रन बनाए। उनी सर्वाधिक रन बनाउने सूचीमा तेस्रो स्थानमा रहे। त्यस्तै बलिङतर्फ सोमपाल कामीले नेपालका लागि सर्वाधिक ११ विकेट लिए। उनी प्रतियोगितामा सर्वाधिक विकेट लिनेको सूचीमा चौथोमा रहे।
माघ ११ गते, २०७१ मा प्रकाशित
