श्रावण ३ गते, २०८२ मा प्रकाशित
काठमाडौँ । निकोलस पूरन जस्ता युवा र उत्कृष्ट खेलाडीले अन्तर्राष्ट्रिय क्रिकेटबाट सन्यास लिने निर्णयले सम्पूर्ण विश्वलाई स्तब्ध बनाएको छ । एक समय विश्व क्रिकेटमा शासन गर्ने वेस्ट इन्डिज टोलीको अवस्था पछिल्ला केही वर्षहरूमा बिग्रिएको छ । टोली विश्वकप र च्याम्पियन्स ट्रफी जस्ता प्रतियोगिताहरूमा छनोट हुन पनि सकेको छैन । टोलीका धेरैजसो खेलाडीहरू विश्वभरका लिगहरूको हिस्सा हुन् र त्यहाँ उत्कृष्ट प्रदर्शन गरेर म्याच विजेता साबित भइरहेका छन्, तर जब देशको लागि खेल्ने कुरा आउँछ, तिनीहरू असफल साबित भइरहेका छन् ।
यस्तो अवस्थामा, महान ब्याट्सम्यान ब्रायन लाराले वेस्ट इन्डिजको क्रिकेट बारे आफ्नो धारणा सार्बजनिक गरेका छन् । लाराले क्यारिबियन खेलाडीहरूले राष्ट्रिय टोलीको दुरुपयोग गरिरहेको बताएका छन् । उनले वेस्ट इन्डिज टोलीलाई विभिन्न लिगहरूको सम्झौता प्राप्त गर्न प्रयोग गरिँदैछ र पूरन जस्ता खेलाडीहरूले यति सानो उमेरमा सन्यास लिनु लज्जाको विषय भएको बताएका छन् । साथै, अन्य देशका खेलाडीहरूले राष्ट्रिय टोलीबाट खेल्नु गर्वको कुरा हुने गरेपनि वेस्ट इन्डिजमा त्यसो हुन नसकेको बताएका छन् ।
इङ्गल्याण्डका फिल टफनेल, डेभिड लोयड, माइकल भन र एलिस्टर कुकसँग पोडकास्टमा कुरा गर्दै लाराले भने, ‘वेस्ट इन्डिज टोलीमा धेरै खेलाडीहरू छन्, जो आफ्नो करियरमा के गर्ने भनेर निर्णय गर्न खोजिरहेका छन् । वेस्ट इन्डिजमा पूरन जस्ता आक्रामक खेलाडीहरू छन्, जसले २९ वर्षको उमेरमा अन्तर्राष्ट्रिय क्रिकेटबाट सन्यास लिएका थिए । र इमानदारीपूर्वक भन्नुपर्दा, उनले किन त्यसो गरे भन्ने कुरा स्पष्ट छ । विश्वभर पाँच वा छ वटा लिगहरू छन् र तिनीहरू त्यहाँ खेलेर पर्याप्त पैसा कमाउन सक्षम छन् ।’
लाराले भने, ‘मलाई यसमा कुनै समस्या छैन । सत्य यो हो कि मलाई लाग्दैन कि वेस्ट इन्डिज क्रिकेट बोर्ड वा प्रशासनले आफ्ना खेलाडीहरूलाई वेस्ट इन्डिज क्रिकेटप्रति वफादार राख्नको लागि अर्थपूर्ण केही गरेको छ, जसरी इङ्गल्याण्ड, अष्ट्रेलिया र भारत जस्ता देशका बोर्डहरूले गरेका छन् । त्यसैले स्वाभाविक रूपमा हाम्रा खेलाडीहरूले आफ्नो करियर अन्यत्र खोजिरहेका छन् । र जब तपाईंले केन विलियमसन वा दक्षिण अफ्रिकी खेलाडीहरूले पनि उही छनौट गरेको देख्नुहुन्छ, तपाईंले बुझ्नुहुन्छ कि यी मानिसहरू केवल आफ्नो परिवारलाई खाना उपलब्ध गराउन खोजिरहेका छन् ।’
गत महिना २९ वर्षको उमेरमा अन्तर्राष्ट्रिय क्रिकेटबाट सन्यासको घोषणा गरेर पुरनले विश्वलाई चकित पारे । हालै इन्डियन प्रिमियर लिग (आईपीएल) मा लखनऊ सुपर जायन्ट्स र मेजर लिग क्रिकेटमा एमआई न्यूयोर्कका लागि उत्कृष्ट प्रदर्शन गरेका २९ वर्षीय खेलाडीले अन्तर्राष्ट्रिय सर्किटबाट सन्यास लिने निर्णयलाई कठिन बताएका छन् । भारत र श्रीलंकामा २०२६ मा हुने टी-२० विश्वकप सुरु हुन एक वर्षभन्दा कम समय बाँकी छ । यस्तो अवस्थामा पुरनको निर्णय २०१६ का विजेताहरूका लागि ठूलो धक्का बनेको छ ।
पुरनले २०१६ मा अन्तर्राष्ट्रिय डेब्यू गरे र १०६ टी-२० अन्तर्राष्ट्रिय र ६१ एकदिवसीय खेल खेले र दुवै ढाँचामा ४ हजार २५८ रन बनाए । उनले क्रिकेटको सबैभन्दा छोटो ढाँचामा २६.१४ को औसतमा २ हजार २७५ रन बनाए र यस अवधिमा उनको स्ट्राइक रेट १३६.३९ थियो । ५० ओभरको क्रिकेटमा उनले ९९.१५ को स्ट्राइक रेट र ३९.६६ को औसतमा १ हजार ९८३ रन बनाए, जसमा तीन शतक र ११ अर्धशतक समावेश छन् ।
अन्य समाचारहरु
