फाल्गुन ६ गते, २०८२ मा प्रकाशित
धनगढी।राष्ट्रिय स्वतन्त्र पार्टी (रास्वपा)का वरिष्ठ नेता बालेन शाहले सुदूरपश्चिमलाई समृद्ध र आत्मनिर्भर बनाउने दाबी गरेका छन् । धनगढीमा रास्वपाको परिवर्तन उद्घोष सभालाई सम्बोधन गर्दै उनले सुदूरपश्चिम बनेको देश बनाउने सपना पूरा गर्ने शक्ति आफ्नो पार्टीसँग मात्र रहेको बताएका हुन् ।
उनले आर्थिक अभावका कारण शिक्षा र स्वास्थ्य सेवाबाट वञ्चित हुनुपरेको अवस्थाको अन्त्य गर्ने प्रतिबद्धता जनाए । ‘खल्तीमा पैसा नभएको, विपन्न गरिबले शिक्षा पाउनुपर्यो, स्वास्थ्य पाउनुपर्यो,’ उनले भने, ‘दुई वर्षमा बन्ने बाटो २० वर्षमा पनि बन्दैन, अब डेढ वर्षमै बन्नुपर्यो, त्यो हो हाम्रो एजेन्डा ।’
नेपाललाई स्विजरल्यान्ड बनाउने चर्चा चल्ने गरेको उल्लेख गर्दै उनले सुदूरपश्चिममै प्राकृतिक र पर्यटकीय सम्भावनाको खानी रहेको बताए । ‘मान्छेले देशलाई स्विजरल्याण्ड बनाउनुपर्छ भन्छन्, तर स्विजरल्याण्डको बाउ बडिमालिका यहीँ छ,’ उनले भने । ‘स्विजरल्याण्डको पराकाष्ठा रामारोशन यहीँ छ, खप्तड नेशनल पार्क यहीँ छ, किन बनाउनुपर्यो स्विजरल्यान्ड ?’
उनले बडिमालिका, रामारोशन र खप्तड राष्ट्रिय निकुञ्ज जस्ता स्थलहरूको उदाहरण दिँदै सुदूरपश्चिमको पहिचान र सम्भावनालाई राष्ट्रिय स्तरमा उजागर गर्नुपर्ने धारणा राखे । ‘हामी नेपालीहरू माल भएको चाल नपाको मान्छे प¥यौं, भएको चिज देखाउन सकेका छैनौँ, सुदूरपश्चिमलाई जोड्न सकेका छैनौँ,’ उनले भने ।
सुदूरपश्चिम र काठमाडौंबीच सांस्कृतिक तथा भावनात्मक एकता आवश्यक रहेको उल्लेख गर्दै उनले सुदूरपश्चिमको पहिचान राष्ट्रिय स्तरमा स्थापित हुनुपर्ने बताए । ‘सुदूरपश्चिम त्यो दिन जोडिन्छ जुन दिन सुदूरपश्चिमका गीतहरू काठमाडौंका चोक चोकमा बज्छन्, अनि बल्ल जोडिन्छ सुदूरपश्चिम काठमाडौंसँग,’ उनले भने ।
सभामा उनले रास्वपा भोट माग्न नभई काम माग्न आएको दाबी गरे । ‘राष्ट्रिय स्वतन्त्र पार्टी तपाईँहरूसँग यहाँ भोट माग्न आएको होइन, काम माग्न आएको हो। काम दिनुस् है,’ उनले भने । ‘तपाईँहरूले भोट दिनु भएन भने पनि राष्ट्रिय स्वतन्त्र पार्टीले सुदूर बनाउँछ । भोट नदिए पनि हुन्छ, बरु कामको लिस्ट दिनुस्, काम गरेर देखाउँछ राष्ट्रिय स्वतन्त्र पार्टीले । सुदूर अब दूर नाइँ झिक्कै झिक्कै माया तमलाई।’
#बालेनशाह #सुदूरपश्चिम #नेपालपहिचान #स्वदेशप्रेम #विकासदृष्टिकोण #नेपालराजनीति #समसामयिकसमाचार #मुख्यसमाचार #नेतृत्व #देशनिर्माण #ArghakhanchiCom #Arghakhanchidotcom #ArghakhanchiComHD
अन्य समाचारहरु
