बैशाख १८ गते, २०८३ मा प्रकाशित
काठमाडौँ । श्रीलङ्कामा क्रिकेट प्रशासन सुधारका लागि नयाँ रूपान्तरण समिति गठन गरिएको छ। सरकारले बुधबार पुरानो नेतृत्व हटाएपछि नौ सदस्यीय समिति गठन गरिएको हो।
समितिमा पूर्व कप्तान कुमार संगाकारा र रोशन महनामासहितका सदस्य समावेश छन् । साथै सिदाथ वेट्टीमुनि पनि समितिमा रहेका छन्। समिति नेतृत्व पूर्व सांसद एरन विक्रमारत्नेलाई दिइएको छ।
समितिका अध्यक्ष विक्रमारत्नेले आफूलाई यो जिम्मेवारी पाउँदा सम्मानित महसुस भएको बताउँदै मुख्यतः दुई प्राथमिकतामा काम गर्ने जानकारी दिएका छन् । पहिलो प्राथमिकता श्रीलङ्का क्रिकेटको संरचना र व्यवस्थापन प्रणालीमा व्यापक सुधार गर्नु रहेको उनले बताए । यसका लागि नयाँ संविधान लागू गरी आधुनिक र प्रभावकारी आधार तयार गर्ने लक्ष्य राखिएको छ।
हालको संविधान पुरानो, अव्यवहारिक तथा भ्रष्टाचार र कमजोरीलाई प्रोत्साहन गर्ने खालको रहेको भन्दै आलोचना हुँदै आएको छ। समितिमा कानुनी विज्ञहरू पनि समावेश गरिएकाले नयाँ संविधान निर्माण प्रमुख काममध्ये एक हुने जनाइएको छ।
समितिको दोस्रो प्राथमिकता मैदानमा उत्कृष्ट प्रदर्शन सुनिश्चित गर्नु रहेको अध्यक्ष विक्रमारत्नेको भनाइ छ। राष्ट्रिय टोलीलाई सशक्त बनाउन आवश्यक संरचना, सुविधा र प्रोत्साहन प्रणाली विकास गरिने योजना अघि सारिएको छ।
यस परिवर्तनबारे अन्तर्राष्ट्रिय क्रिकेट परिषद्ले अहिलेसम्म औपचारिक प्रतिक्रिया जनाएको छैन। यसअघि भने सन् २०२३ मा राजनीतिक हस्तक्षेपको आरोपमा श्रीलङ्का क्रिकेटलाई निलम्बन गरिएको थियो।
नयाँ समितिमा खेलकुद, व्यापार, कानुन र राजनीतिक क्षेत्रका व्यक्तिहरू समावेश छन्। नौ सदस्यीय समितिमा एक महिला सदस्य पनि रहेकी छन्।
टी–२० विश्वकपमा खराब प्रदर्शनपछि पुरानो नेतृत्वमाथि व्यापक आलोचना बढ्दै गएको थियो। त्यसैको पृष्ठभूमिमा सरकारले नयाँ समिति गठन गरेको हो ।
अन्य समाचारहरु
