जेष्ठ ६ गते, २०८३ मा प्रकाशित
सिरियाको राजधानी दमासकसमा मंगलवार भएको एक कार बम विष्फोटमा परी एक सैनिकको मृत्यु भएको छ भने अन्य १२ जना घाइते भएका छन् । अधिकारीहरूकाअनुसार दमासकसको पूर्वी भागमा पर्ने बाब शर्की क्षेत्रस्थित रक्षा निकायको भवन नजिकै उक्त विष्फोट भएको हो ।
सेनाको एक टोलीले सो भवन नजिकै एउटा विष्फोटक पदार्थ फेला पारी त्यसलाई निष्क्रिय बनाउने प्रयास गरिरहेका बेला नजिकै पार्क गरिएको कार बम विष्फोट भएको मिडिया तथा सञ्चार प्रशासनले जनाएको छ । प्रत्यक्षदर्शीहरूकाअनुसार विष्फोटको आवाज निकै शक्तिशाली थियो, जुन दमासकसका विभिन्न जिल्लाहरूमा सुनिएको थियो ।
विष्फोटलगत्तै उक्त क्षेत्रमा गोली चलेको आवाज समेत सुनिएको उनीहरूले बताएका छन् । बेलायतस्थित मानव अधिकारवादी संस्था ‘सिरियन अब्जर्भेटरी फर ह्युमन राइट्स’ काअनुसार उक्त विष्फोट पूर्वी दमासकसमा रहेको हतियार प्रशासन मुख्यालयको प्रवेशद्वार नजिक भएको हो । सरकारी टेलिभिजन अल–इखबरियाले सुरुमा अल–द्वैला क्षेत्रमा अज्ञात कारणले विष्फोट भएको रिपोर्ट गरे पनि पछि अधिकारीहरूले घटनाको विस्तृत विवरण सार्वजनिक गरेका थिए ।
सन् २०२४ डिसेम्बरमा पूर्वराष्ट्रपति बसर अल–असदको सत्ता पतन भएपछि सिरियामा ठूलास्तरका युद्धहरूमा केही कमी आएपनि सुरक्षा चुनौतीहरू अझै कायम छन् । मुलुकमा कार बम विष्फोट, इजरायली हवाई आक्रमण र विगत १४ वर्ष लामो गृहयुद्धका क्रममा बाँकी रहेका विष्फोटक पदार्थहरूका कारण बेलाबेला यस्ता सुरक्षा घटनाहरू भइरहेका छन् ।
अन्य समाचारहरु
