रास्वपा अर्घाखाँची जिल्ला सभापति दौडमा प्रकाश चन्द्र आचार्यको उम्मेदवारी घोषणा, अधिवेशन नजिकिँदै जाँदा प्रतिस्पर्धा थप तीव्र

अर्घाखाँची डटकम, सम्बाददाता।

अर्घाखाँची । राष्ट्रिय स्वतन्त्र पार्टी (रास्वपा) अर्घाखाँची जिल्ला अधिवेशन नजिकिँदै जाँदा जिल्ला सभापति पदको नेतृत्व चयनलाई लिएर राजनीतिक सरगर्मी तीव्र बनेको छ। यही सन्दर्भमा पार्टी अनुशासन आयोगका सदस्य प्रकाश चन्द्र आचार्यले जिल्ला सभापति पदका लागि आफ्नो औपचारिक उम्मेदवारी घोषणा गरेका छन्।

आचार्यले सामाजिक सञ्जालमार्फत आफ्नो धारणा सार्वजनिक गर्दै नेतृत्वप्रति आफ्नो दाबी स्पष्ट पारेका हुन्। उनले उम्मेदवारी घोषणा गर्दै भनेका छन्, “म बाहेक अरू कोही योग्य छैनन् भन्ने मानक स्थापित गर्नु हो भने, म पनि रास्वपा अर्घाखाँचीको सभापति पदका लागि उम्मेदवार भएको घोषणा गर्दछु।”

आगामी जेठ २४ गते हुने जिल्ला अधिवेशनलाई केन्द्रमा राखेर जिल्लाभर विभिन्न नेताहरूले आफ्नो दाबी सार्वजनिक गरिरहँदा आचार्यको उम्मेदवारीले प्रतिस्पर्धालाई थप चासोपूर्ण बनाएको छ। पार्टीभित्रको आन्तरिक लोकतन्त्र, संगठनात्मक सुदृढीकरण र नेतृत्व छनोट प्रक्रियालाई लिएर कार्यकर्ताहरूबीच व्यापक छलफल भइरहेको छ।

पार्टी स्रोतका अनुसार जिल्ला सभापति पदका लागि केही नेताहरूबीच अनौपचारिक छलफल र आन्तरिक प्रतिस्पर्धा बढ्दै गएको छ। यसैबीच आचार्यको उम्मेदवारीलाई संगठनभित्र अनुभवी, सक्रिय र वैचारिक रूपमा स्पष्ट नेतृत्वको रूपमा हेरिएको बताइन्छ।

प्रकाश चन्द्र आचार्य लामो समयदेखि पार्टी संगठन विस्तारमा सक्रिय रहँदै आएका नेता हुन्। पार्टी स्थापनाकालदेखि नै विभिन्न तहमा जिम्मेवारी निर्वाह गरेका उनले यसअघि सन्धिखर्क नगर संगठनको नेतृत्व समेत सम्हालेका थिए। वडा तहदेखि जिल्ला तहसम्म संगठन विस्तारमा उनको भूमिका महत्वपूर्ण रहेको कार्यकर्ताहरूको भनाइ छ।

शैक्षिक, बौद्धिक तथा संवाद क्षमताका कारण परिचित आचार्यले जिल्लामा पार्टीलाई संस्थागत रूपमा बलियो बनाउन निरन्तर काम गर्दै आएको दाबी गर्दै आएका छन्। संगठन सञ्चालन, कार्यकर्ता परिचालन र राजनीतिक कार्यक्रम व्यवस्थापनमा समेत उनको अनुभव रहेको बताइन्छ।

जिल्ला अधिवेशन नजिकिँदै जाँदा विभिन्न आकांक्षीहरूले आफ्नो दाबी सार्वजनिक गरिरहेका बेला नेतृत्व चयन प्रक्रिया थप प्रतिस्पर्धात्मक बन्दै गएको देखिन्छ। यसले पार्टीभित्र आन्तरिक लोकतान्त्रिक अभ्यासलाई अझ मजबुत बनाउने अपेक्षा गरिएको छ।

यद्यपि अन्तिम निर्णय जिल्ला अधिवेशनमा सहभागी प्रतिनिधिहरूले मतदानमार्फत गर्ने भएकाले अहिलेको प्रतिस्पर्धा प्रारम्भिक चरणमै सीमित रहेको नेताहरू बताउँछन्। “जान्नेलाई छान्ने” नीति अवलम्बन गर्दै आएको रास्वपाले अर्घाखाँचीमा कस्तो नेतृत्व चयन गर्छ भन्ने विषय अहिले जिल्लाभर चासोको केन्द्र बनेको छ।

अधिवेशनपछि नयाँ नेतृत्वले संगठन विस्तार, जनसम्पर्क र आगामी राजनीतिक रणनीति कस्तो बनाउँछ भन्ने विषय पनि महत्वपूर्ण रहने देखिन्छ।

#RSP #Arghakhanchi #RSPConvention #LeadershipRace #PrakashChandraAcharya #NepalPolitics #ArghakhanchiCom #ArghakhanchiComHD #ArghakhanchiDotCom