जेष्ठ ३० गते, २०८३ मा प्रकाशित
काठमाडौँ । जारी फिफा विश्वकप फुटबलको समूह ‘डी’ को पहिलो खेलमा आज बिहान आयोजक अमेरिका र पाराग्वे बिहान आमनेसामने हुँदैछन् । क्यालिफोर्नियास्थित सोफी मैदानमा हुने खेल नेपाली समय अनुसार आज बिहान ६: ४५ बजेदेखि शुरु हुदै छ ।
विश्व वरीयतामा १७औँ स्थानमा रहेको अमेरिकाले १६ वर्षपछि विश्वकपमा फर्किएको पाराग्वेको सामना गर्न लागेको हो । यद्यपि पाराग्वेले आफ्नो प्रमुख आक्रमणकारी जुलियो एन्सिसोलाई चोटका कारण गुमाएको छ ।
प्रशिक्षक माउरिसियो पोचेटिनोको नेतृत्वमा रहेको अमेरिकाको तयारी मिश्रित रहेको छ । टोलीले पछिल्ला पाँच खेलमध्ये दुई खेल मात्र जित्न सफल भएको छ। यद्यपि सेनेगलमाथिको ३–२ को जितले टोलीमा केही आत्मविश्वास थपेको छ ।
पाराग्वे भने प्रशिक्षक गुस्ताभो अल्फारोको नेतृत्वमा बलियो रक्षात्मक शैलीमा खेल्ने टोलीका रूपमा चिनिएको छ । दक्षिण अमेरिकी छनोट चरणमा उसले १८ खेलमा मात्र १४ गोल गरे पनि १० गोल मात्र खाएको थियो ।
अमेरिकाको आक्रमणको मुख्य जिम्मेवारी क्रिस्टियन पुलिसिक र फोलारिन बालोगुनमाथि रहनेछ । पाराग्वेका लागि एन्टोनियो सानाब्रिया र मिगुएल अल्मिरोन प्रमुख खेलाडी रहनेछन् ।
अमेरिका र पाराग्वेबीच हालसम्म नौ पटक भेट भएको छ । तीमध्ये अमेरिकाले पाँच खेल जितेको छ भने पाराग्वे दुई खेलमा विजयी भएको छ। दुई खेल बराबरीमा सकिएका छन् ।
विश्वकप इतिहासमा पाराग्वेले आयोजक राष्ट्रलाई कहिल्यै पराजित गर्न सकेको छैन । त्यसैले घरेलु समर्थकमाझ खेल्ने अमेरिकालाई यस खेलमा बलियो दाबेदार मानिएको छ ।
अन्य समाचारहरु
