श्रावण २५ गते, २०८३ मा प्रकाशित
सञ्जय मिश्रा
रौतहट, २५ साउन। पूर्व–पश्चिम राजमार्गअन्तर्गत बारा जिल्लाको निजगढ–धन्सार खोला पुल नजिक सडकको अवस्था लामो समयदेखि जोखिमपूर्ण बन्दै गएको छ। सडकमा देखिएको क्षति करिब तीन वर्षदेखि क्रमशः बढ्दै गए पनि त्यसको स्थायी समाधानतर्फ सम्बन्धित निकायले प्रभावकारी कदम नचालेको यात्रुहरूको गुनासो छ।
दिनहुँ हजारौँ सवारीसाधन गुड्ने देशकै प्रमुख राजमार्गमा सडकको एक भागमा भ्वाङ तथा क्षति देखिँदा समेत लामो समयसम्म मर्मत नहुनुले सडक सुरक्षा र सरकारी निकायको अनुगमनमाथि गम्भीर प्रश्न उठाएको छ।
यात्रु प्रितम कुमार मिश्रले सामाजिक सञ्जाल फेसबुकमार्फत सडकको तस्वीर सार्वजनिक गर्दै सम्बन्धित निकायको ध्यानाकर्षण गराएका छन्। उनले सडकको क्षति नयाँ नभएको र करिब तीन वर्षदेखि क्रमशः बिग्रिँदै गएको उल्लेख गर्दै तत्काल मर्मत गर्न माग गरेका छन्
सडकमा देखिएको सामान्य क्षति समयमै मर्मत गर्न सके ठूलो दुर्घटना रोक्न सकिन्छ। तर, मुख्य राजमार्गमै वर्षौँसम्म सडकको अवस्था जोखिमपूर्ण रहनुले सम्बन्धित सडक कार्यालय तथा जिम्मेवार निकायको नियमित अनुगमन कति प्रभावकारी छ भन्ने प्रश्न उठेको छ।
विशेषगरी वर्षायाममा पानी जम्ने तथा सडकको भित्री संरचना कमजोर हुने सम्भावना हुन्छ। त्यसमाथि दैनिक रूपमा हुने भारी सवारीसाधनको चापले अहिले सामान्य देखिएको क्षति समयमै नियन्त्रण नगरिए भोलि सडकको ठूलो भाग भासिन सक्ने वा अचानक सवारीसाधन दुर्घटनामा पर्ने अवस्था आउन सक्ने यात्रुहरूको चिन्ता छ।
महेन्द्र राजमार्ग पूर्वदेखि पश्चिमसम्मको यातायातको प्रमुख मेरुदण्ड हो। यस सडकमा हुने सानो कमजोरीले समेत ठूलो जनधनको क्षति निम्त्याउन सक्छ। विशेषगरी रातिको समयमा सडकमा रहेको भ्वाङ वा क्षतिग्रस्त भाग सहजै देख्न नसकिने भएकाले दुईपांग्रे सवारीसाधन बढी जोखिममा पर्न सक्छन्। तीव्र गतिमा गुड्ने बस, ट्रक तथा अन्य सवारीसाधनसमेत अचानक क्षतिग्रस्त भागमा पर्दा दुर्घटना हुन सक्ने सम्भावना रहन्छ।
त्यसैले ‘दुर्घटना भएपछि मात्रै मर्मत गर्ने कि दुर्घटना हुनुअघि नै जोखिम हटाउने ?’ भन्ने प्रश्न अहिले सम्बन्धित निकाय माथि उठेको छ।
यात्रु मिश्रले सामाजिक सञ्जालमा तस्वीर सार्वजनिक गरेपछि लामो समयदेखि बेवास्तामा परेको भनिएको सडकको अवस्थाबारे फेरि बहस सुरु भएको छ।
सडकको क्षति देख्दादेख्दै पनि वर्षौँसम्म मर्मत नहुनु सामान्य विषय होइन। सडकको नियमित निरीक्षण, जोखिमयुक्त स्थानको पहिचान र समयमै मर्मत गर्ने जिम्मेवारी सम्बन्धित निकायको भए पनि व्यवहारमा त्यसको प्रभावकारी कार्यान्वयन हुन नसकेको देखिन्छ।
अब प्रश्न उठेको छ- सडक भासिएपछि, ठूलो दुर्घटना भएपछि वा मानवीय क्षति भएपछि मात्रै सम्बन्धित निकायको ध्यान जाने हो ? निजगढ–धन्सार खोला पुल नजिकको क्षतिग्रस्त सडकको तत्काल प्राविधिक निरीक्षण गरी क्षतिको वास्तविक अवस्था पहिचान गर्नुपर्ने यात्रु तथा स्थानीयको माग छ।
सडकको बाहिरी भाग मात्रै टालटुल गर्नेभन्दा क्षतिको मूल कारण पहिचान गरी आवश्यकताअनुसार स्थायी मर्मत तथा पुनर्निर्माण गर्नुपर्ने देखिन्छ। मुख्य राजमार्गमा वर्षौँदेखि जोखिम निम्त्याइरहेको सडकको अवस्था तत्काल सुधार नगर्ने हो भने सम्भावित दुर्घटनाको जोखिम झन् बढ्नेछ।
सडकमा दुर्घटना नहुँदासम्म पर्खने कि दुर्घटना हुनुअघि नै जिम्मेवार निकायले आफ्नो दायित्व पूरा गर्न अब सम्बन्धित निकायले यसको जवाफ दिनुपर्ने बेला आएको छ।
अन्य समाचारहरु
