श्रावण २९ गते, २०८३ मा प्रकाशित
संस्कृति, पर्यटन तथा नागरिक उड्डयनमन्त्री खडकराज पौडेलले नेपाल वायुसेवा निगम (नेपाल एयरलाइन्स) को आमूल सुधारका लागि सार्वजनिक–निजी साझेदारी (पीपीपी) मोडलमा जानुपर्ने बताउनुभएको छ ।
नेपालका पर्यटन व्यवसायीहरूको छाता सङ्गठन नेपाल एशोसिएशन अफ टुर एण्ड ट्राभल एजेन्ट्स (नाटा) को ५९ औं अधिवेशनलाई शुक्रवार सम्बोधन गर्दै मन्त्री पौडेलले यस्तो बताउनुभएको हो । राष्ट्रिय ध्वजावाहक निगम हाल चरम ऋण, राजनीतिक हस्तक्षेप र कर्मचारीतन्त्रको बेथितिमा फसेको उल्लेख गर्दै उहाँले यसको पुनर्संरचना अपरिहार्य भएको बताउनु भयो ।
निगमको सुधारका लागि आफू अध्ययनकै क्रममा रहेको जानकारी दिँदै उहाँले यसलाई उद्धार गर्न पीपीपी मोडलमा लैजानुपर्नेमा आफ्नो दृढता रहेको स्पष्ट पार्नुभयो ।
यस प्रक्रियामा सरोकारवालाहरूको साथ र सहयोगको अपेक्षा गर्दै उहाँले सार्वजनिक क्षेत्रमा यस विषयमा वैचारिक बहस सिर्जना गर्न समेत अपिल गर्नुभयो । मन्त्री पौडेलले भन्नुभयो, ‘राष्ट्रिय ध्वजावाहकप्रति हामी सबैको गर्व छ तर हाल यो ऋणमा चुर्लुम्म डुबेको र विभिन्न बेथितिमा फसेको अवस्था छ । यसलाई राजनीतिक र कर्मचारीतन्त्रको दलदलबाट बाहिर निकालेर बचाउन आमूल पुनर्संरचना आवश्यक छ । राष्ट्रिय ध्वजावाहकको सुधारबिना पर्यटकीय गन्तव्यको लक्ष्य पूरा गरेका कुनैपनि देश मैले देखेको छैन । त्यसैले नेपालको पर्यटन प्रवद्र्धनका लागि निगमको सुधार हुनैपर्छ ।’
मन्त्री पौडेलले पर्यटन क्षेत्रको विकासका लागि बलियो राष्ट्रिय ध्वजावाहक हुनुपर्ने बताउनु भयो ।
अन्य समाचारहरु
