भाद्र २२ गते, २०८३ मा प्रकाशित
काठमाडौं, २२ भदौ। इटालियन ग्रान्ड प्रिक्सको कठिन दौडपछि सात पटकका च्याम्पियन लुइस ह्यामिल्टनले यस वर्षको फर्मुला वान विश्व च्याम्पियनसिप जित्ने आफ्नो सम्भावना लगभग समाप्त भएको स्वीकार गरेका छन्। मोन्जामा भएको उक्त दौड मर्सिडिजका युवा चालक किमि एन्टोनेलीले जितेका छन्।
ग्रिडको १९औँ स्थानबाट उत्कृष्ट पुनरागमन गर्दै जित निकालेका एन्टोनेली ६० वर्षपछि घरेलु भूमिमा इटालियन ग्रान्ड प्रिक्स जित्ने पहिलो इटालियन चालक बनेका छन्।
अर्कातिर, ह्यामिल्टन भने छैटौँ स्थानमा मात्र सीमित रहे। यो नतिजासँगै १० वटा दौडहरू बाँकी छँदा ह्यामिल्टन शीर्ष स्थानका एन्टोनेलीभन्दा ७६ अंकले पछि परेका छन्।
दौडका क्रममा ह्यामिल्टन र फेरारीका उनकै टोली-साथी चार्ल्स लेक्लेर्कबिच टक्कर समेत भएको थियो। ह्यामिल्टनका अनुसार फेरारीले चालकहरूको व्यवस्थापन र दौड सञ्चालनबारे आफ्ना सुझावहरू नसुन्दा यो स्थिति आएको हो। पहिलो ल्यापको पहिलो ‘सिकेन’ (मोड) मा लेक्लेर्कलाई उछिन्ने प्रयास गर्दा ह्यामिल्टन ट्र्याकबाहिर धकेलिएर १०औँ स्थानमा झरेका थिए। दोस्रो ल्यापमा भएको अर्को दुर्घटनापछि लेक्लेर्कले भने दौड छाड्नुपरेको थियो।
“आजको दौडपछि हामी अंकका हिसाबले धेरै पछि परेका छौँ। टोलीले मलाई प्राथमिकता दिने निर्णय लिन अब धेरै ढिलो भइसकेको छ,” ह्यामिल्टनले भने, “म केवल आफ्नो उत्कृष्ट प्रदर्शन गर्ने प्रयास मात्र गर्न सक्छु। मर्सिडिजको गति हेर्दा यो अंकको अन्तर कम गर्नु अत्यन्तै कठिन छ।”
ह्यामिल्टनले फेरारीको रणनीति र सञ्चालनगत कमजोरीको जिम्मेवारी टोली प्रमुख फ्रेड भासेउरले लिनुपर्ने बताएका छन्। “मैले सधैं निष्पक्ष र नियमसम्मत ढङ्गले प्रतिस्पर्धा गरेको छु। तर, माथिल्लो तहबाटै स्पष्ट निर्देशन र सोच आउनु आवश्यक छ, जसको सुरुवात फ्रेडबाटै हुन्छ,” उनले थपे।
“मैले पहिले नै भनिसकेको छु कि हामीले हाम्रो सञ्चार शैलीबारे पुनर्विचार गर्नुपर्ने हुन्छ; किनभने यदि हामीले उही बाटो पछ्याइरह्यौँ भने नतिजा पनि उस्तै आउनेछ।”
लेक्लेर्क अहिले एन्टोनेलीभन्दा ११२ अंकले पछि छन् र भासेउरले टोलीले अब ह्यामिल्टनलाई प्राथमिकता दिने विषयमा विचार गर्ने संकेत गरेका छन्।
“पहिलो र दोस्रो मोडको नतिजा टोलीका लागि राम्रो छैन,” भासेउरले भने, “के हामीसँग ‘टिम अर्डर’ (टोलीको निर्देशन) वा त्यस्तै कुनै व्यवस्था हुनेछ? मलाई लाग्छ, मैले अघि गरेको तुलना सान्दर्भिक छ। गत वर्ष सिजनको यसै चरणमा ओस्कार पियास्त्री म्याक्लारेनका लागि अघि थिए; यदि म्याक्लारेनले पियास्त्रीमाथि नै पूर्ण रूपमा ध्यान केन्द्रित गरेको भए, म्याक्स भर्स्टापेन च्याम्पियन बन्ने थिए।”
“कुनै न कुनै बिन्दुमा निर्णय लिनैपर्ने हुन्छ, तर मलाई लाग्छ मोन्जा (Monza) अघि नै निर्णय लिनु हतारो हुन्थ्यो। अब हामीसँग टोलीका सदस्यहरूसँग छलफल गर्ने समय छ।”
अर्को साताको अन्त्यमा म्याड्रिडमा हुने अर्को चरणको दौडलाई ध्यानमा राख्दै यो छलफल छिटो हुनुपर्नेछ। तर ह्यामिल्टनले फेरारीले समस्याहरू समाधान गर्नुपर्ने कुरामा जोड दिए र ‘स्कुडेरिया’ (फेरारी टोली) को कार्यशैलीको तुलना आफ्नो पूर्व टोली तथा च्याम्पियनसिपको शीर्ष स्थानमा रहेको मर्सिडिजसँग गर्दै असन्तुष्टि व्यक्त गरे।
“म मर्सिडिजमा हुँदा हाम्रा लागि स्पष्ट नियमहरू तय गरिएका थिए र हामीले कहिल्यै पनि ठूलो समस्याको सामना गर्नु परेन,” उनले द गार्जियनसँग भने, “म र निको [रोजबर्ग] बिच केही पटक समस्या देखिए पनि प्रायः सबै कुरा राम्रो नै थियो। यहाँ भने कुनै नियमहरू छैनन्। यो कुरा सायद परिवर्तन हुनुपर्छ।”
अन्य समाचारहरु
