आश्विन ७ गते, २०८३ मा प्रकाशित
-केशव पन्थी, अर्घाखाँची डटकम
अर्घाखाँची । लामो समयदेखि बन्द रहेको अर्घाखाँचीको सन्धिखर्कस्थित सन्तोषी माँ चलचित्र हल नयाँ व्यवस्थापन, सुधारिएको भौतिक संरचना र आधुनिक प्राविधिक प्रणालीसहित आगामी शुक्रबारदेखि पुनः सञ्चालनमा आउने भएको छ।
२०४६ सालमा स्थापना भएको सन्तोषी माँ चलचित्र हल २०६६ सालदेखि बन्द अवस्थामा थियो। लामो समयपछि नयाँ व्यवस्थापनसहित हल पुनः सञ्चालनमा ल्याउन लागिएपछि जिल्लाका चलचित्रप्रेमी दर्शकमा उत्साह थपिएको छ।
हललाई दर्शकमैत्री र व्यवस्थित बनाउँदै चलचित्र हेर्न आउने दर्शकलाई सहज तथा मनोरञ्जनपूर्ण वातावरण प्रदान गर्ने गरी आवश्यक सुधार गरिएको सञ्चालकहरूले बुधबार सन्धिखर्कमा आयोजित पत्रकार सम्मेलनमार्फत जानकारी दिएका छन्।
हलका सञ्चालक बलबहादुर कुँवरका अनुसार आगामी शुक्रबारदेखि हलमा नियमित रूपमा चलचित्र प्रदर्शन सुरु हुनेछ। लामो समयपछि आफ्नै जिल्लामा चलचित्र हेर्ने सुविधा पुनः उपलब्ध हुन लागेकाले यसले स्थानीय चलचित्रप्रेमीलाई प्रत्यक्ष लाभ पुग्ने उहाँले बताउनुभयो।
नयाँ व्यवस्थापनसहित सञ्चालनमा आउन लागेको हलमा २०८ भन्दा बढी सिट क्षमता रहेको छ। दर्शकको सुविधा र अनुभवलाई प्राथमिकतामा राख्दै हलको भौतिक तथा प्राविधिक पक्षमा आवश्यक सुधार गरिएको सञ्चालकहरूको भनाइ छ।
हल पुनः सञ्चालनका लागि ६ जना सेयर सदस्य सहभागी भएर व्यवस्थापनको तयारी गरिएको सेयर सदस्य सागर खड्काले जानकारी दिनुभयो। उहाँका अनुसार पुरानो हललाई समयअनुकूल बनाउँदै नयाँ प्रविधि तथा व्यवस्थापकीय सुधारसहित सञ्चालनमा ल्याउन लागिएको हो।
हलमा चलचित्र प्रदर्शनका लागि आवश्यक नयाँ प्राविधिक प्रणाली जडान गरिएको छ। दर्शकले विगतको तुलनामा अझ सहज, व्यवस्थित र गुणस्तरीय वातावरणमा चलचित्र हेर्न सकून् भन्ने उद्देश्यले व्यवस्थापनमा विशेष ध्यान दिइएको सञ्चालकहरूले बताएका छन्।
सन्तोषी माँ हल पुनः सञ्चालनमा आएपछि अर्घाखाँचीसँगै छिमेकी जिल्ला गुल्मी र प्युठानका चलचित्रप्रेमी दर्शकलाई समेत लक्षित गरी चलचित्र प्रदर्शन गरिने तयारी गरिएको छ। दर्शकको रुचि र मागअनुसार नयाँ तथा लोकप्रिय चलचित्र प्रदर्शनमा ल्याउने योजना रहेको सञ्चालकहरूले बताएका छन्।
लामो समयदेखि जिल्लामा नियमित चलचित्र हलको अभाव महसुस गर्दै आएका दर्शकका लागि हलको पुनः सञ्चालनले स्थानीयस्तरमै मनोरञ्जनको सुविधा उपलब्ध गराउनेछ। साथै, चलचित्र क्षेत्रसँगै स्थानीय व्यापार तथा मनोरञ्जन गतिविधिमा समेत सकारात्मक प्रभाव पार्ने अपेक्षा गरिएको छ।
सञ्चालकहरूले सन्तोषी माँ चलचित्र हललाई केवल चलचित्र प्रदर्शन गर्ने स्थानका रूपमा मात्र नभई अर्घाखाँचीको व्यवस्थित मनोरञ्जन तथा चलचित्र संस्कृतिको केन्द्रका रूपमा विकास गर्ने लक्ष्य राखिएको बताएका छन्।
लामो समय बन्द रहेको पुरानो हल नयाँ व्यवस्थापन र प्रविधिसहित पुनः सञ्चालनमा आउन लागेसँगै सन्धिखर्कमा चलचित्रप्रेमीका लागि नयाँ उत्साह थपिएको छ। आगामी दिनमा दर्शकको चाहना र सुविधालाई केन्द्रमा राख्दै हलले निरन्तर गुणस्तरीय सेवा दिन सके अर्घाखाँचीमा चलचित्र क्षेत्रको थप विकास र विस्तारमा समेत योगदान पुग्ने देखिन्छ।
सन्तोषी माँ चलचित्र हलको पुनः सञ्चालनसँगै अर्घाखाँचीमा चलचित्रप्रेमीका लागि आफ्नै ठाउँमा नयाँ–नयाँ चलचित्र हेर्ने अवसर पुनः फर्किएको छ।
तस्बिर : केशव पन्थी, अर्घाखाँची डटकम
अन्य समाचारहरु
