आश्विन १९ गते, २०८३ मा प्रकाशित
ब्राजिलमा सम्पन्न राष्ट्रपतीय निर्वाचनमा कुनैपनि उम्मेदवारले स्पष्ट बहुमत प्राप्त गर्न नसकेपछि अब सत्ताको टुङ्गो दोस्रो चरणको मतदानबाट लाग्ने भएको छ । निर्वाचन आयोगकाअनुसार प्रारम्भिक मत परिणाममा बहालवाला राष्ट्रपति लुइज इनासियो लुला दा सिल्भा र लिबरल पार्टीका फ्लेभियो बोल्सोनारोबीच कडा प्रतिस्पर्धा देखिएको छ ।
आईतवार सार्वजनिक भएको ९९ प्रतिशतभन्दा बढी मतगणनाको नतिजाले निर्वाचनलाई दोस्रो चरणमा धकेलेको छ । निर्वाचन आयोगले जनाएअनुसार लिबरल पार्टीका उम्मेदवार फ्लेभियो बोल्सोनारोले करिब ४७ प्रतिशत मत प्राप्त गर्दै अग्रता लिएका छन् । यसैगरी, वर्कर्स पार्टीका तर्फबाट मैदानमा उत्रिएका बहालवाला राष्ट्रपति लुइज इनासियो लुला दा सिल्भा ४५ प्रतिशत मतका साथ दोस्रो स्थानमा रहेका छन् ।
ब्राजिलको संवैधानिक व्यवस्थाअनुसार पहिलो चरणमा कुनै पनि उम्मेदवारले ५० प्रतिशतभन्दा बढी वैध मत प्राप्त गर्न नसकेको अवस्थामा दोस्रो चरणको मतदान अनिवार्य हुन्छ । अब यी दुई मुख्य प्रतिस्पर्धीहरूबीच आगामी अक्टोबर २५ मा पुनः मतदान हुनेछ । यसपटकको निर्वाचन नतिजाले दक्षिण अमेरिकी राष्ट्र ब्राजिलको आगामी राजनीतिक भविष्य र नीतिगत दिशा निर्धारण गर्ने भएकाले विश्वभरिबाट यसलाई चासोका साथ हेरिएको छ ।
निर्वाचन आयोगले अन्तिम नतिजा सार्वजनिक गरेसँगै दुवै उम्मेदवारहरूले दोस्रो चरणको रणनीति बनाउन थालेका छन् । अक्टोबर २५ को मतदानले ब्राजिलको सत्ताको बागडोर कसको हातमा जानेछ भन्ने कुराको अन्तिम फैसला गर्नेछ ।
अन्य समाचारहरु
