कार्तिक १३ गते, २०८२ मा प्रकाशित
काठमाडौँ ।टर्किएले बेलायतबाट ८ अर्ब पाउण्ड (१०.६४ अर्ब अमेरिकी डलर) मा २० वटा युरोफाइटर टाइफुन लडाकु जेट किन्ने सम्झौतामा हस्ताक्षर गरेको छ । अंकाराले अशान्त क्षेत्रीय परिदृश्यको बीचमा आफ्नो रक्षा क्षमतालाई सुदृढ पार्न खोजिरहेको बेला यो सम्झौता भएको हो । बेलायती प्रधानमन्त्री केयर स्टारमरको उपस्थितिमा अंकारामा भएको १० वर्षे सम्झौताको हस्ताक्षर समारोहपछि टर्कीका राष्ट्रपति रेसेप तैयप एर्दोगानले सम्झौतालाई दुई नजिकका सहयोगीहरू बीचको रणनीतिक सम्बन्धको नयाँ प्रतिकका रुपमा चित्रण गर्नुभयो । यसले रक्षा उद्योगमा संयुक्त परियोजनाहरूको ढोका पनि खोल्ने विश्वास व्यक्त गर्नुभयो ।
युरोफाइटर टाइफुन लडाकु जेटहरूको खरिदको लागि कार्यान्वयन व्यवस्था अन्तर–प्रतिनिधिमण्डल बैठकहरूमा हस्ताक्षर गरिएको थियो । स्टारमरले आफ्नो तर्फबाट दुई देशहरू एक बलियो रणनीतिक साझेदारीतर्फ एक कदम अघि बढेको बताउनु भयो ।
दुई देशहरू बीचको यो सहयोगको पहिलो चरणको साथ बेलायतले टर्कीलाई २० युरोफाइटर टाइफुन जेटहरू आपूर्ति गर्नेछ । जुलाई २०२४ मा बेलायती प्रधानमन्त्रीको रूपमा पदभार ग्रहण गरेपछि स्टारमरको टर्कीको यो पहिलो भ्रमण हो । यात्राको क्रममा दुई नेताहरूले अंकाराको राष्ट्रपति परिसरमा एक–एक वार्ता गरेका छन् । त्यसपछि अन्तर–प्रतिनिधिमण्डल बैठकहरू गरेका थिए । यसअघि दिनको शुरुमा टर्कीका रक्षामन्त्री यासर गुलरले पत्रकारहरूलाई देशले कतारबाट १२, ओमानबाट १२ र बेलायतबाट २० वटा कुल ४४ युरोफाइटर टाइफुन जेटहरू खरिद गर्ने योजना बनाएको बताउनु भयो । अर्को वर्षको शुरुमा डेलिभरी शुरु हुने अपेक्षा गरिएको छ ।
अन्य समाचारहरु
