पौष २३ गते, २०८२ मा प्रकाशित
काठमाडौं । सिरियाको उत्तरी शहर अलेप्पोमा ‘सिरियन डेमोक्रेटिक फोर्सेस’ (एसडीएफ) ले सरकारी सेनाको ठेगानाहरूलाई लक्षित गरी गरेको ड्रोन आक्रमणमा परी तीन जना सर्वसाधारणको मृत्यु भएको छ । सरकारी सञ्चारमाध्यमकाअनुसार मंगलवार भएको यस आक्रमणमा अन्य कैयौँ व्यक्तिहरू घाइते भएका छन् ।
जसले गर्दा क्षेत्रमा तनाव थप चर्किएको छ । राज्य नियन्त्रित समाचार एजेन्सी सानाकाअनुसार अलेप्पोको शेख मकसुद क्षेत्र नजिकै सेना तैनाथ गरिएको स्थानमा ड्रोन प्रहार गरिएको थियो । उक्त आक्रमणमा परी तीन सर्वसाधारणले ज्यान गुमाएका छन् भने रक्षा मन्त्रालयका तीन कर्मचारीसहित अन्य केही व्यक्तिहरू घाइते भएका छन् ।
अलेप्पोको मिडिया निर्देशनालयले यस आक्रमणलाई अल–शिहान चोक नजिकैको क्षेत्रसम्म विस्तार गरिएको बताउँदै यसलाई एसडीएफ र सिरियाली सरकारबीच भएको सम्झौताको नयाँ उल्लंघनको संज्ञा दिएको छ ।
आक्रमणपछि सर्वसाधारणको सुरक्षा र यातायात व्यवस्थापनका लागि उक्त क्षेत्रमा आन्तरिक सुरक्षा बल र प्रहरी परिचालन गरिएको सानाले जनाएको छ । मार्च १०, २०२५ मा अन्तर्राष्ट्रिय मध्यस्थतामा भएको सम्झौताअनुसार एसडीएफ नियन्त्रित बल र संस्थाहरूलाई सिरियाली राज्य संरचनामा समाहित गर्ने र एकीकृत कमान्ड निर्माण गर्ने लक्ष्य राखिएको थियो । तर आपसी अविश्वास र निरन्तरका सुरक्षा घटनाहरूका कारण उक्त सम्झौताको कार्यान्वयन पक्ष हालसम्म अन्योलमा छ ।
अन्य समाचारहरु
