बढ्दो तेल मूल्यबारे छलफल गर्न आज जी- सेभेनका अर्थमन्त्रीको बैठक बस्दै

काठमाडौँ । विश्व बजारमा तेलको मूल्य बढ्दै जाँदा र ऊर्जा संकट गहिरिँदै गएपछि जी- सेभेन समूहका देशका अर्थमन्त्रीहरूले आज बैठक गर्ने भएका छन् । बैठकमा आपतकालीन तेल भण्डार बजारमा निकाल्ने प्रस्तावबारे छलफल हुने जनाइएको छ ।

अन्तर्राष्ट्रिय सञ्चार माध्यमहरूको जानकारी अनुसार यो योजनाअन्तर्गत अन्तर्राष्ट्रिय ऊर्जा निकायको समन्वयमा आपतकालीन भण्डारबाट तेल बजारमा पठाउने सम्भावनाबारे चर्चा हुनेछ । यसको उद्देश्य बजारमा आपूर्ति बढाएर मूल्य नियन्त्रणमा राख्नु हो ।

अहिलेसम्म जी-सेभेनका तीन देशले यो प्रस्तावको समर्थन गरिसकेको बताइएको छ ।

जी-सेभेन विश्वका प्रमुख विकसित अर्थतन्त्र भएका सात देशहरूको समूह हो । यसमा क्यानडा, फ्रान्स, जर्मनी, इटाली, जापान, बेलायत र अमेरिका रहेका छन् ।

विशेषज्ञहरूका अनुसार आपतकालीन भण्डारबाट तेल बजारमा पठाइएमा विश्व बजारमा आपूर्ति बढ्न सक्ने र तेलको मूल्यमा परेको दबाब केही कम हुन सक्ने अनुमान गरिएको छ ।