कुवेत, जोर्डन र साउदी अरेबियामा मिसाइल र ड्रोन आक्रमण

काठमाडौँ । कुवेत अन्तर्राष्ट्रिय विमानस्थलमा ड्रोन आक्रमण हुँदा इन्धन ट्यांकीमा आगलागी भएको छ ।

कुवेत नागरिक उड्डयन प्राधिकरणले घटनाको पुष्टि गर्दै प्रारम्भिक जानकारीअनुसार मानवीय क्षति नभएको जनाएको छ । प्रवक्ता अब्दुल्ला अल राजहीका अनुसार क्षति सम्पत्तिमा मात्रै सीमित रहेको छ । घटना लगत्तै विमानस्थलमा आपतकालीन व्यवस्था लागू गरिएको छ भने दमकलसहितका टोली आगो नियन्त्रणमा जुटेका छन् ।

यता, जोर्डन र साउदी अरेबियामा पनि मिसाइल र ड्रोन आक्रमणको घटना सार्वजनिक भएको छ । जोर्डनको राजधानी अम्मान नजिकै कम जनघनत्व भएको क्षेत्रमा मिसाइलका टुक्रा खसेको जनाइएको छ । त्यहाँ पनि कुनै मानवीय क्षति नभएको अधिकारीहरूले बताएका छन् । युद्ध सुरु भएदेखि हालसम्म जोर्डनभर सयौँ मिसाइलका अवशेष खसेका बताइएको छ ।

साउदी अरेबियाले सुरक्षा सतर्कता बढाएको छ । साउदी रक्षा मन्त्रालयका अनुसार पूर्वी क्षेत्रमा लक्षित एक बैलिस्टिक मिसाइल र कम्तीमा छ वटा ड्रोनलाई वायु प्रतिरक्षा प्रणालीले खसालेको छ ।