बैशाख ६ गते, २०८३ मा प्रकाशित
अर्घाखाँची डट्कम सम्वाददाता
“संस्कृति जोगाऔँ, चली आएको परम्परा जोगाऔँ” भन्ने मूल नारासहित अर्घाखाँचीको शीतगंगा नगरपालिका वडा नं. ५ गल्धाका युवाहरूले भजन प्रशिक्षण तथा भजन गाउने अभियान सञ्चालन गरेका छन्। पछिल्लो समय आधुनिक जीवनशैलीसँगै हराउँदै गइरहेको धार्मिक तथा सांस्कृतिक परम्परालाई जोगाउने उद्देश्यले युवाहरूको सक्रियतामा उक्त कार्यक्रम सुरु गरिएको हो।
स्थानीय स्तरमै सुरु गरिएको यस अभियानअन्तर्गत युवाहरू नियमित रूपमा भेला भई भजन, कीर्तन तथा धार्मिक गीतहरूको अभ्यास गर्ने गरेका छन्। साथै गाउँघरका विभिन्न स्थानमा सामूहिक रूपमा भजन गाउने कार्यक्रमसमेत आयोजना हुँदै आएको छ। यसले न केवल सांस्कृतिक संरक्षणमा टेवा पुर्याएको छ, बरु समाजमा आपसी एकता, सहकार्य र सद्भाव बढाउन समेत महत्वपूर्ण भूमिका खेलेको स्थानीयवासीहरूले बताएका छन्।
कार्यक्रममा सहभागी युवाहरूले आफ्नो मौलिक पहिचान जोगाउन र नयाँ पुस्तालाई संस्कृतिप्रति आकर्षित गराउन यस्तो अभियान आवश्यक भएको बताएका छन्। उनीहरूका अनुसार भजन तथा कीर्तन जस्ता धार्मिक गतिविधिहरूले मानिसको दैनिक जीवनमा सकारात्मक ऊर्जा, अनुशासन र नैतिकताको विकास गर्न सहयोग पुर्याउँछ।
स्थानीय अगुवाहरू तथा बुद्धिजीवीहरूले पनि युवाहरूको यस्तो प्रयासको प्रशंसा गर्दै यसले पुराना परम्परा संरक्षणमा महत्वपूर्ण योगदान पुर्याउने विश्वास व्यक्त गरेका छन्। उनीहरूले यस्ता कार्यक्रमलाई निरन्तरता दिँदै अझ व्यवस्थित र व्यापक बनाउँदै लैजानुपर्नेमा जोड दिएका छन्।
यस अभियानले गाउँस्तरमा हराउँदै गइरहेका धार्मिक तथा सांस्कृतिक गतिविधिलाई पुनर्जीवित गर्न महत्वपूर्ण भूमिका खेल्ने अपेक्षा गरिएको छ।
अन्य समाचारहरु
