बैशाख ८ गते, २०८३ मा प्रकाशित
-केशव पन्थि , अर्घाखाँची डट्कम
अर्घाखाँची । जिल्ला स्वास्थ्य कार्यालय अर्घाखाँचीको आयोजनामा सञ्चारकर्मीहरूका लागि स्वास्थ्य सचेतना सम्बन्धी विशेष प्रशिक्षण कार्यक्रम सम्पन्न भएको छ।
कार्यक्रममा जिल्ला अस्पताल अर्घाखाँचीका वरिष्ठ चिकित्सक डा. खगेन्द्र आचार्यले सर्ने तथा नसर्ने रोगहरूको अवस्था, फैलावट, रोकथाम र समयमै उपचारको महत्वबारे विस्तृत जानकारी दिनुभयो। उहाँले विशेषगरी मधुमेह, उच्च रक्तचाप र मुटुरोग जस्ता नसर्ने रोगप्रति सचेत रहन आग्रह गर्नुभयो।
त्यसैगरी जनस्वास्थ्य अधिकृत अंकिता बस्यालले समुदायमा स्वास्थ्य सचेतना फैलाउन सञ्चारकर्मीहरूको भूमिका महत्वपूर्ण रहेको बताउँदै सही र विश्वसनीय सूचना प्रवाहले जनस्वास्थ्यमा सकारात्मक प्रभाव पार्ने उल्लेख गर्नुभयो।
कार्यक्रममा औषधिको सही प्रयोग, डोज, र चिकित्सकको सल्लाहबिना सेवन गर्दा हुने जोखिमबारे पनि जानकारी दिइएको थियो। जनस्वास्थ्य निरीक्षक गणेशराज पौडेलले यस्ता कार्यक्रमले सञ्चारकर्मीलाई अझ सशक्त बनाउने विश्वास व्यक्त गर्नुभयो।
कार्यक्रम जिल्ला स्वास्थ्य कार्यालय प्रमुख कृष्णप्रसाद पोखरेलको अध्यक्षतामा सम्पन्न भएको हो भने नेपाल पत्रकार महासंघ अर्घाखाँचीका अध्यक्ष गणेश खनालले स्वास्थ्यसम्बन्धी जिम्मेवार पत्रकारिताको आवश्यकता औंल्याउनुभयो।
समग्रमा कार्यक्रमले सञ्चारकर्मीहरूको स्वास्थ्य ज्ञान अभिवृद्धि गर्दै समुदायमा स्वास्थ्य सचेतना फैलाउने लक्ष्य सफलतापूर्वक पूरा गरेको छ।
अन्य समाचारहरु
