बैशाख २७ गते, २०८३ मा प्रकाशित
लाउरा फर्नान्डेजले कोस्टारिकाको राष्ट्रपतिको रूपमा पद तथा गोपनीयताको शपथ लिनुभएको छ । सान जोसस्थित नेशनल स्टेडियममा आयोजित एक विशेष समारोहका बीच उहाँले आगामी चार वर्षका लागि राष्ट्रपतिको कार्यभार सम्हाल्नुभएको हो ।
३९ वर्षीया फर्नान्डेजलाई निवर्तमान राष्ट्रपति रोड्रिगो चाभेसले राष्ट्रपतीय ओहोदाको प्रतीक ’स्यास’ हस्तान्तरण गर्नुभयो । उक्त समारोहमा विभिन्न देशका विशिष्ट अतिथिहरूसहित करिब २० हजार सर्वसाधारणको उपस्थिति रहेको थियो ।
सोभरेन पिपल्स पार्टी’ का तर्फबाट उम्मेदवार बन्नुभएकी फर्नान्डेजले गत फेब्रुअरी १ मा भएको निर्वाचनमा जित हासिल गर्नुभएको थियो । यसअघि उहाँले राष्ट्रिय योजना तथा आर्थिक नीति मन्त्री र त्यसपछि राष्ट्रपतीय मन्त्रीका रूपमा जिम्मेवारी सम्हालिसक्नुभएको छ ।
राष्ट्रपतिको रूपमा आफ्नो पहिलो सम्बोधन गर्दै फर्नान्डेजले आफ्नो सरकारले अपराध नियन्त्रणलाई प्राथमिकता दिने र राज्यका निकायहरूमा लागुऔषध तस्करीको प्रभाव रोक्ने प्रतिवद्धता व्यक्त गर्नुभयो । सोही अवसरमा उहाँले मुलुकमा एउटा नयाँ ‘मेगा–जेल’ (विशाल कारागार) निर्माण गर्ने र विश्वकै अत्याधुनिक मध्येको एक प्रहरी निगरानी केन्द्र स्थापना गर्ने योजनासमेत घोषणा गर्नुभयो ।
अन्य समाचारहरु
