जेष्ठ ४ गते, २०८३ मा प्रकाशित
काठमाडौँ । अमेरिकामा आयोजित एक चर्चित सैन्य हवाई प्रदर्शनीका क्रममा दुई लडाकु विमान आपसमा ठोक्किँदा ठूलो दुर्घटना भएको छ । अमेरिकी नौसेनाका दुई ईए–१८ लडाकु विमान हावामै एकआपसमा ठोक्किएपछि भीषण विस्फोट भएको थियो भने विमानमा आगलागीसमेत भएको थियो ।
यो घटना आइतबार अमेरिकाको माउन्टेन होम एयर फोर्स बेसमा आयोजित ‘गनफाइटर स्काइज एयर शो’ का क्रममा भएको हो । उक्त कार्यक्रम अमेरिकी सेनाको शक्ति प्रदर्शन र सर्वसाधारणको मनोरञ्जनका लागि आयोजना गरिएको थियो ।
प्रदर्शनीका क्रममा दुई विमान निकै नजिकबाट उडेर जोखिमपूर्ण हवाई कौशल प्रदर्शन गरिरहेका बेला अचानक नियन्त्रण गुमाएर एकआपसमा ठोक्किएको बताइएको छ । सामाजिक सञ्जालमा सार्वजनिक भएका भिडियोमा ठक्करपछि विमानबाट चिङ्गारी निस्किएको, त्यसपछि आगोको ठूलो मुस्लो बनेर कालो धुवाँसहित तीव्र गतिमा जमिनतर्फ खसेको देखिन्छ ।
दुर्घटनाका क्रममा विमानमा रहेका सबै चालक दलका सदस्य भने सुरक्षित रहेका छन् । उनीहरूले समयमै प्यारासुटको सहायताले विमानबाट बाहिर निस्केर ज्यान जोगाएको अमेरिकी सेनाले जनाएको छ । भिडियोमा आकाशमा चारवटा प्यारासुट खुलेको समेत देखिएको थियो ।
घटनापछि माउन्टेन होम एयर फोर्स बेसलाई तत्काल बन्द गरिएको थियो । उद्धार टोली, दमकल र आपतकालीन सेवाका कर्मचारी तुरुन्त घटनास्थलमा पुगेका थिए ।
सेनाले दुर्घटनाको कारणबारे विस्तृत अनुसन्धान सुरु गरिएको जनाएको छ । प्रारम्भिक चरणमा विमान किन ठोक्किए भन्नेबारे स्पष्ट जानकारी सार्वजनिक गरिएको छैन । साथै प्यारासुटबाट हाम फाल्ने क्रममा चालक दलका सदस्य घाइते भए वा नभएकोबारे पनि आधिकारिक विवरण दिइएको छैन ।
दुर्घटनापछि बाँकी हवाई प्रदर्शनी तत्काल रद्द गरिएको थियो । माउन्टेन होम प्रहरीले स्थानीय बासिन्दालाई एयर बेस क्षेत्रतर्फ यात्रा नगर्न आग्रह गरेको छ । उद्धार तथा सुरक्षा कार्य नसकिएसम्म सर्वसाधारणलाई घटनास्थलबाट टाढा रहन भनिएको छ ।
यो सैन्य हवाई अड्डा अमेरिकाको इडाहो राज्यस्थित बोइस सहरबाट करिब ८० किलोमिटर दक्षिण–पूर्वमा पर्छ । हवाई प्रदर्शनीमा अमेरिकी वायु सेनाको चर्चित ‘थन्डरबर्ड्स’ टोलीसमेत सहभागी रहेको थियो, जसलाई कार्यक्रमको मुख्य आकर्षण मानिएको थियो ।
अन्य समाचारहरु
