फिफा विश्वकपको सबैभन्दा महँगो टिकट १ करोड १२ लाख सम्मको !

न्यु जर्सी, १५ जेठ । विश्वभरका फुटबल प्रशंसकहरू तीन हप्ता पछि सुरु हुने २३ औं फिफा विश्वकप २०२६ को टिकटको लागि दौडिरहेका छन्।  जुन ११ देखि जुलाई ९ सम्म संयुक्त राज्य अमेरिका, क्यानडा र मेक्सिकोका १६ शहरहरूमा आयोजना हुने विश्वको सबैभन्दा लोकप्रिय प्रतियोगिताको टिकट सुरक्षित गर्न राजनीतिक प्रयासहरू पनि भइरहेका छन्।

यसैबिच, आगामी विश्वकप फाइनलका लागि न्यूयोर्क शहरका मेयर जोहरान ममदानीले फिफाबाट ५० अमेरिकन डलर मूल्यमा १ हजार टिकटहरू सुरक्षित गर्न महत्त्वपूर्ण छुट प्राप्त गरेका छन्। यी टिकटहरू अब स्थानीय बासिन्दाहरूलाई मतपत्र मार्फत वितरण गरिने भएको छ।

न्यूयोर्क शहरका मेयर जोहरान ममदानीले छिमेकी न्यू जर्सीको मेटलाइफ स्टेडियममा खेलिने खेलहरूका लागि छुटमा प्राप्त गरेका १ हजार टिकटहरू रहेका छन । यी टिकटहरू चुनाव जस्तै मतदान मार्फत वितरण गरिनेछ। यसमा पाँच समूह चरणका खेलहरू, राउन्ड अफ ३२ मा एक खेल र राउन्ड अफ १६ मा एक खेल समावेश छ । तर, जुलाई १९ मा हुने फाइनल खेलमा भने सो टिकट लगेर हेर्न पाइने छैन् ।

यो प्रतियोगिताको लागि अहिलेसम्म घोषणा गरिएको यस प्रकारको एक मात्र शहर–अधिग्रहित पहुँच कार्यक्रम हो। मेटलाइफ स्टेडियम न्यूयोर्क शहरको पश्चिममा पूर्वी रदरफोर्ड, न्यू जर्सीमा अवस्थित छ। यसलाई फिफा २०२६ को लागि न्यूयोर्क न्यु जर्सी स्टेडियम भनिएको छ। प्रतियोगिताको फाइनल खेल पनि यसै रंगशालामा खेल्ने तालिका छ।

तर, यी अमेरिकन ५० डलरवाला सिटहरू विश्वकपको प्राथमिक टिकट बजारमार्फत प्रशंसकहरूले खरिद गर्न सक्ने सबैभन्दा सस्तो टिकटहरू हुन्।

खरीददारहरूले खेलहरूमा निःशुल्क राउन्ड–ट्रिप बस यात्रा पनि पाउनेछन्। न्यु जर्सीको मेटलाइफ स्टेडियममा हुने खेलहरूको लागि यी टिकटहरू मतपत्रद्वारा वितरण गरिनेछ र न्यूयोर्क शहरका बासिन्दाहरूलाई मात्र उपलब्ध रहेको छ । यो उनको मेयर चुनाव अभियानको क्रममा ममदानीको माग अनुरूप छ, जसमा उनले स्थानीय बासिन्दाहरूलाई यस गर्मीको प्रतियोगितामा बढी पहुँच प्रदान गर्न फिफालाई आग्रह गरेका थिए।

त्यसो त, फिफा विश्वकप फुटबलको टिकटको मूल्य ६० देखि १० हजार अमेरिकी डलरसम्म रहेका छन् ।  टिकटको मूल्य मागको आधारमा गतिशील मूल्य निर्धारणमा आधारित हुन्छ। जुलाई १९ मा न्यु जर्सीको मेटलाइफ स्टेडियममा हुने तय भएको विश्वकप फाइनलको टिकटको मूल्य ३ हजार ५०० देखि ७३ हजार २०० अमेरिकन डलरसम्ममा बिक्री हुने जनाइएको छ ।