मोफसलको प्रतिष्ठित फुटवल प्रतियोगिता बुढासुब्बा टुबोर्ग गोल्डकपको १४ औं संस्करण आजदेखि सुनसरीको धरानमा सुरु भएको छ ।
प्रतियोगिताको उद्घाटन खेलमा मनाङ मस्र्याङ्दी क्लव विजयी भएको छ ।
मनाङले आयोजक धरान फुटबल क्लवलाई १-० ले पराजित गर्दै पहिलो जित दर्ता गराएको हो । जितसंगै मनाङ मस्र्याङ्दी क्लब सेमिफाइनलमा प्रवेश गरेको छ । खेलमा क्लबका तर्फबाट दोस्रो हाफको २९ औं मिनेटमा जाम्बो एनाटोलीले गरेको गोल नै निर्णायक सावित हुनपुग्यो । राष्ट्रिय टिमका व्यवसायिक खेलाडीहरु भएको आयोजक धरान फुटबल क्लबले मनाङलाई दह्रो चुनौति दिन सकेन ।
यो सँगै अघिल्लो वर्षको गोल्डकप विजेता मनाङ मस्र्याङ्दीलाई घरेलु भुमिमा पराजित गर्ने दाउमा रहेको धरान फुटबल क्लब निराश बनेको छ । प्रतियोगितामा भुटान, हङकङ, अफ्रिकन युनाइटेड, नेपाल पुलिस क्लब, थ्री स्टार क्लब, हिमालयान शेर्पा, मनाङ मस्र्याङदी र आयोजक धरान फुटबल क्लब गरी आठ टीम सहभागी छन् । पुर्वाञ्चलको सबैभन्दा ठूलो पुरस्कार राशी रहेको प्रतियोगिताको विजेताले तीन लाख नगद पुरस्कार पाउनेछ भने उपविजेताले १ लाख ५० हजार पाउनेछन् ।
भोलीको खेल मेघा थ्री स्टार र अफ्रिकन युनाइटेड क्लबबिच हुने छ ।
चैत्र ११ गते, २०६८ मा प्रकाशित
