श्रावण २२ गते, २०८३ मा प्रकाशित
काठमाडौं, २२ साउन । मनसुनको मौसमले गर्मीबाट राहत त दिन्छ तर यसले घरमा प्रयोग हुने पानीको सरसफाइमा विशेष ध्यान दिनुपर्ने आवश्यकता पनि सिर्जना गर्छ।
वर्षाको समयमा पानीका ट्याङ्कीहरूमा फोहोर, ब्याक्टेरिया र अन्य हानिकारक तत्वहरू मिसिने जोखिम बढी हुन्छ। घरको ट्याङ्कीको पानी नुहाउन, लुगा धुन, खाना पकाउन र कहिलेकाहीँ पिउनसमेत प्रयोग गरिन्छ, त्यसैले, ट्याङ्की सफा नगर्दा पानीको गुणस्तरमा असर पर्न सक्छ।
वर्षाको पानीसँगै ट्याङ्कीको वरिपरि धुलो, माटो, पातपतिङ्गर र साना किराहरू जम्मा हुन सक्छन्। यदि ट्याङ्कीको बिर्को राम्ररी बन्द गरिएको छैन वा त्यसमा चिरा परेको छ भने दूषित पदार्थहरू भित्र पस्न सक्छन्। लामो समयसम्म पानी जम्मा गरेर राख्दा ट्याङ्की भित्र फोहोर र लेउ पनि जम्मा हुन सक्छ। त्यसैले, मनसुनको समयमा केही कुराहरूमा ध्यान पुर्याएर पानीको ट्याङ्कीलाई सफा र सुरक्षित अवस्थामा राख्न सकिन्छ।
वर्षायाममा पानीको ट्याङ्कीको बिर्को राम्ररी बन्द राख्नु अत्यन्त आवश्यक छ। खुला वा आंशिक रूपमा मात्र छोपिएको ट्याङ्कीमा वर्षाको पानी, धुलो, पात पतिङ्गर र कीराहरू सजिलै पस्न सक्छन्, जसले गर्दा पानी दूषित हुने जोखिम बढ्छ। त्यसैले, बिर्को राम्ररी लागेको छ कि छैन भनी समय समयमा जाँच गर्नुहोस्। यदि बिर्को फुटेको छ वा त्यसले राम्ररी नछोपी ठूला खाली ठाउँहरू छोड्छ भने बाहिरी अशुद्धताहरू ट्याङ्कीभित्र पस्नबाट रोक्न त्यसलाई मर्मत गर्नुहोस् वा बदल्नुहोस्।
पानीको ट्याङ्कीमा देखिएको सानो चिरालाई पनि बेवास्ता गर्नु हुँदैन। वर्षाको समयमा, यस्ता चिरा वा क्षतिग्रस्त भागहरूबाट फोहोर पानी र मैलो ट्याङ्की भित्र पस्न सक्छ। त्यसैले, मनसुनको समयमा ट्याङ्कीको बाहिरी भागको नियमित रूपमा निरीक्षण गर्नुहोस्। यदि पानी चुहिरहेको छ वा कुनै चिरा देखिएको छ भने तुरुन्तै त्यसको मर्मत गराउनु होस्। ट्याङ्कीको वरिपरि लगातार पानी जम्ने समस्याप्रति पनि ध्यान दिनु आवश्यक छ।
पानीको ट्याङ्की सफा गर्नु मात्र पर्याप्त छैन्। यससँग जोडिएका इनलेट अर्थात पानी भित्रिने, आउटलेट अर्थात पानी बाहिरिने र ओभरफ्लो पाइपहरू सफा गर्नु पनि उत्तिकै आवश्यक छ। वर्षायाममा यी पाइपहरू भित्र वा वरपर पातपतिङ्गर, माटो र अन्य फोहोर जम्मा हुन सक्छ। यस्ता अवरोधहरूले पानीको बहाव रोक्न सक्छन् र दूषित पदार्थहरू पानीको आपूर्ति प्रणालीसम्म पुग्न दिन्छन्। त्यसैले, मनसुनको समयमा यी पाइपहरूको नियमित निरीक्षण गर्नुहोस् र देखिएका कुनै पनि अवरोधहरू हटाउनु होस्।
यदि ट्याङ्कीमा पानी लामो समयसम्म प्रयोग नगरी राखियो भने त्यसमा लेउ र सूक्ष्मजीवहरू पलाउने सम्भावना बढ्छ। त्यसैले, पानीलाई लामो समयसम्म स्थिर वा जमेर बस्न नदिनुहोस् । आवश्यकताअनुसार यसको प्रयोग गर्नुहोस् र ट्याङ्कीमा ताजा पानी भर्दै गर्नुहोस्। यदि घर लामो समयसम्म बन्द रहने अवस्था छ भने फर्केपछि पुरानो पानी सिधै प्रयोग गर्नुको सट्टा ट्याङ्की र पानीको अवस्था जाँच गर्न नबिर्सनु होस्।
ट्याङ्कीको पानीमा देखिने केही परिवर्तनहरूले यसलाई सफा गर्नुपर्ने आवश्यकतालाई सङ्केत गर्न सक्छन्। पानी असामान्य रूपमा धमिलो वा रङ परिवर्तन भएको देखिनु, अनौठो गन्ध आउनु वा ट्याङ्कीभित्र फोहोर र लेउ जम्मा हुनुजस्ता लक्षणहरूलाई बेवास्ता गर्नु हुँदैन। यस्तो अवस्थामा ट्याङ्कीको जाँच गराई सफा गर्नु उत्तम हुन्छ। पानी सफा देखिँदैमा ट्याङ्की नै पूर्ण रूपमा सफा छ भन्ने हुँदैन, त्यसैले नियमित सरसफाइ आवश्यक छ।
सम्भव भएसम्म ट्याङ्की र त्यसको वरिपरिको क्षेत्र सफा राख्नुहोस्। ट्याङ्कीलाई सिधै पर्ने कडा घामबाट बचाउनु होस् र यसको वरिपरि फोहोर जम्मा हुन नदिनुहोस्। पानीलाई सुरक्षित राख्न ट्याङ्कीको गुणस्तर र अवस्थाले महत्त्वपूर्ण भूमिका खेल्छ। मनसुनको समयमा ट्याङ्की नियमित रूपमा सफा गर्ने, बिर्को राम्ररी बन्द गरेर राख्ने, पाइपहरूको जाँच गर्ने र चुहावट भएमा तुरुन्तै मर्मत गर्ने जस्ता सामान्य सावधानीहरू अपनाउनु निकै प्रभावकारी हुन सक्छ।
अन्य समाचारहरु
