अयोध्यामा बन्ने भयो भगवान् वेंकटेश्वर अर्थात् बालाजीको भव्य मन्दिर, १० एकड जग्गा माग

सञ्जय मिश्रा

रौतहट, ६ असोज । भारतको धार्मिक नगरी अयोध्यामा भगवान् वेंकटेश्वर स्वामी अर्थात् तिरुपति बालाजीको भव्य मन्दिर निर्माणको तयारी अघि बढेको छ। आन्ध्र प्रदेशका मुख्यमन्त्री एन. चन्द्रबाबु नायडूले उत्तर प्रदेशका मुख्यमन्त्री योगी आदित्यनाथलाई पत्र पठाउँदै अयोध्यामा मन्दिर निर्माणका लागि ५ देखि १० एकडसम्म जग्गा उपलब्ध गराउन औपचारिक आग्रह गरेका छन्।

प्रस्तावअनुसार तिरुमला तिरुपति देवस्थानम् (टी टी डी) को नेतृत्वमा भगवान् वेंकटेश्वर स्वामीको मन्दिरसँगै सूचना केन्द्र र तीर्थयात्रीका लागि आवश्यक सुविधाहरू निर्माण गर्ने योजना छ।

मुख्यमन्त्री नायडूले अयोध्यामा बालाजी मन्दिर स्थापना भएपछि उत्तर भारतको अयोध्या र दक्षिण भारतको तिरुपति क्षेत्रबीचको धार्मिक, सांस्कृतिक तथा आध्यात्मिक सम्बन्ध थप बलियो हुने बताएका छन्।

धार्मिक पर्यटनको नयाँ केन्द्र बन्न सक्ने

यो प्रस्ताव कार्यान्वयन भएमा अयोध्यामा राममन्दिरसँगै दक्षिण भारतीय वैष्णव परम्परासँग जोडिएको अर्को महत्वपूर्ण धार्मिक केन्द्र थपिनेछ। अयोध्या पुग्ने तीर्थयात्रीले एउटै धार्मिक यात्रामा भगवान् राम र भगवान् वेंकटेश्वरको दर्शन गर्ने अवसर पाउनेछन्।

विशेषगरी दक्षिण भारतबाट अयोध्या आउने श्रद्धालुका लागि बालाजी मन्दिर आकर्षणको थप केन्द्र बन्न सक्छ। मन्दिरसँगै सूचना केन्द्र र तीर्थयात्री सुविधाको विकास गरिएमा धार्मिक पर्यटन, अन्तरप्रदेशीय सांस्कृतिक सम्बन्ध तथा स्थानीय आर्थिक गतिविधि समेत विस्तार हुन सक्ने देखिन्छ।

यस प्रस्तावले अयोध्यालाई केवल राममन्दिर केन्द्रित तीर्थस्थलका रूपमा नभई भारतका विभिन्न धार्मिक परम्परालाई जोड्ने प्रमुख आध्यात्मिक गन्तव्यका रूपमा विकास गर्ने सम्भावना पनि देखाएको छ। यद्यपि जग्गा उपलब्ध गराउने विषयमा उत्तर प्रदेश सरकारको निर्णय र त्यसपछि हुने औपचारिक प्रक्रिया पूरा भएपछि मात्रै निर्माण योजनाले ठोस रूप लिनेछ।