आश्विन ११ गते, २०८३ मा प्रकाशित
म्याग्दी । म्याग्दीको अन्नपूर्ण गाउँपालिका–३ फगाममा अविरल वर्षाका कारण पहिरो खस्दा एक घर पुरिएको छ । पहिरोमा परी एक जनाको मृत्यु भएको छ भने एक जना बेपत्ता भएकी छन् ।
आइतबार बिहान करिब ९: ३० बजे माथिबाट पहिरो खस्दा गंगाबहादुर पाइजाको घर पुरिएको हो। घरमा रहेका चार जनामध्ये ७५ वर्षीया शिलकुमारी गर्बुजाको शव बिहान ११: ३० बजे फेला परेको थियो ।
सोही घटनामा ५४ वर्षीया योमाया पुर्जा बेपत्ता भएकी छन् । घरका अन्य सदस्य भने सकुशल रहेको जनाइएको छ । उद्धारका लागि इलाका प्रहरी कार्यालय दाना, म्याग्दीबाट प्रहरी सहायक निरीक्षक जुद्धबहादुर थापाको नेतृत्वमा तीन जनाको प्रहरी टोली घटनास्थलतर्फ खटिएको छ । टोलीले उद्धार तथा बेपत्ताको खोजी गरिरहेको जनाइएको छ ।
घटनास्थल इलाका प्रहरी कार्यालय दानाबाट करिब ८ किलोमिटर उत्तरमा पर्छ । घटनाको थप विवरण आउन बाँकी रहेको छ ।
अन्य समाचारहरु
