आश्विन २० गते, २०८३ मा प्रकाशित
काठमाडाैं, २० असाेज । विश्व फुटबलका महान् खेलाडी लियोनेल मेस्सीले आज (अक्टोबर ६) आफ्नो खेल जीवनको अन्तिम अन्तर्राष्ट्रिय म्याच खेलेका छन । गत ३१ अगस्ट २०२६ मा अन्तर्राष्ट्रिय फुटबलबाट सन्यासको घोषणा गरेका मेस्सीका लागि अर्जेन्टिनी फुटबल संघले घरेलु मैदानमा भव्य ‘फेयरवेल म्याच’ (बिदाइ खेल) को आयोजना गरेको हो।
सन् २००५ मा १८ वर्षको उमेरमा राष्ट्रिय टोलीबाट डेब्यु गरेका मेस्सीले अर्जेन्टिनाका लागि २० वर्षसम्म निरन्तर योगदान दिएका छन्। यस अवधिमा उनले देशका लागि २०७ खेल खेल्दै १२५ गोल गरेका छन्, जुन अर्जेन्टिनी फुटबल इतिहासकै सर्वाधिक गोल संख्या हो।
मेस्सीका प्रमुख अन्तर्राष्ट्रिय उपलब्धिहरूमा फिफा विश्वकप: २०२२ (विजेता) र २०१४ (उपविजेता), कोपा अमेरिका: २०२१ र २०२४ (दुई पटक विजेता), फिनालिसिमा: २०२२, ओलम्पिक स्वर्ण पदक: २००८ (बेइजिङ) मुख्य रहेका छन ।
अर्जेन्टिना फुटबल संघका अध्यक्ष क्लाउडियो तापिया तथा विश्वभरका लाखौँ समर्थकहरूले मेस्सीको यो अभूतपूर्व योगदानको सम्मान गर्दै घरेलु दर्शकमाझ यो ऐतिहासिक बिदाइ खेल समर्पित गरेका हुन्। आज भएकाे खेलसँगै मेस्सीको दुई दशक लामो गौरवशाली अन्तर्राष्ट्रिय फुटबल यात्राको औपचारिक समापनसमेत भएकाे छ ।
यस्ताे छ मेस्सीका महत्वपुर्ण भनाइहरूः
“हरेक वर्षको सुरुवातमा म अघिल्ला सिजनहरूका नतिजासँग तुलना नगरी सबै कुरा हासिल गर्ने लक्ष्यका साथ अघि बढ्छु।
मैत्रीपूर्ण खेल होस्, अङ्कका लागि खेलिने स्पर्धा होस्, फाइनल होस् वा अन्य कुनै पनि म्याच, म सधैँ एउटै समर्पणका साथ खेल्छु। म सधैँ आफ्नो टोली, स्वयं र समर्थकहरूका लागि उत्कृष्ट प्रदर्शन गर्दै जित दिलाउने प्रयास गर्छु।
ममा तीव्र प्रतिस्पर्धात्मक भावना छ, त्यसैले हार्दा मलाई निकै नराम्रो लाग्छ। पराजयको बेला मेरो अवस्था हेरेरै त्यो महसुस गर्न सकिन्छ; म निकै खिन्न हुन्छु र कसैसँग कुरा गर्न मन पराउँदिनँ।
नयाँ जीवन सुरु गर्न अर्जेन्टिना र आफ्नो परिवार छाड्ने निर्णय गरेर मैले ठूलो त्याग गरेँ। मैले साथीभाइ, आफन्तदेखि लिएर आफ्नो सम्पूर्ण परिवेश बदलेँ। तर मैले जे-जति गरेँ, त्यो केवल फुटबल र आफ्नो सपना पूरा गर्नका लागि गरेँ।
मैले अझै पनि सडकमा खेल्ने बालबालिका जस्तै खेलको आनन्द लिने गरेको छु। जुन दिन मलाई यसमा रमाइलो लाग्न छाड्छ, त्यही दिन म फुटबलबाट सन्न्यास लिनेछु।
म कहिल्यै अर्जेन्टिनी पहिचानबाट पछि हटिनँ र त्यस्तो चाहना पनि राखिनँ। देश छाडेर आए पनि मलाई अर्जेन्टिनी हुनुमा निकै गर्व लाग्छ। सानै उमेरदेखि म यस विषयमा स्पष्ट थिएँ र कहिल्यै बदलिन चाहिनँ।
मेरो स्वभावको एउटा बलियो पक्षले मलाई धक्काहरू सहँदै जितको प्रयास जारी राख्न मद्दत गर्छ। ममा सधैँ लडेर फेरि उठ्ने र अघि बढ्ने क्षमता रहँदै आएको छ।
बाल्यकालमा होचो कदका कारण मलाई कसैले जिस्काएनन्। वास्तवमा, मलाई लाग्छ—सानो कदकै कारण मैले झन् बढी माया पाएँ।
म भाग्यमानी छु कि म आफ्नो रुचिकै क्षेत्रमा काम गरेर जीवन बिताइरहेको छु; जबकि धेरै मानिसहरू आफूलाई मन नपर्ने काम गर्न बाध्य छन् र त्यसबापत निकै कम पारिश्रमिक पाउँछन्।”
अन्य समाचारहरु
