टीकाराम तामाङ, काठमाडौं
अख्तियार दुरुपयोग अनुसन्धान आयोगका प्रमुख आयुक्त लोकमानसिंह कार्कीविरुद्धको महाअभियोग प्रस्तावमा छलफल प्रारम्भ हुनासाथ संसद बैठक लामो समयसम्मका लागि स्थगित भएको छ ।
नजिकिँदै गरेको तिहार, छठ पर्व लगायत कारण देखाउँदै संसद बैठक दुई हप्ताभन्दा बढी समयका लागि पर सारिएको हो । संसद् सचिवालयका प्रवक्ता भरतराज गौतमले दीपावली, छठ पर्वमा सांसदहरु आ आफ्नो घर जाने भएकाले संसद बैठक दुई हप्ताका लागि स्थगित गरिएको बताए । मंगलबार महाअभियोग प्रस्तावमाथि छलफल सुरु भएपछि संसद बैठक कात्तिक २५ गतेसम्मलाई स्थगित भएको छ ।
तर, सत्तारुढ दल कांग्रेससाग सहमति नभएका कारण संसद बैठक लामो समयलाई स्थगित गरेको नेताहरुले बताएका छन् । माओवादी केन्द्रका सांसद् रामनारायण बिडारीले प्रमुख सत्ता साझेदार दल नेपाली कांग्रेससँग सहमति नभएका कारण बैठक ढिला गरी बोलाउन सभामुखलाई सुझाव दिएको जानकारी दिए । उनले भने, संसद बैठक टाढा पुर्याउनुमा कांग्रेससँग सहमति नभएरै हो, यसबीचमा कांग्रेसलाई सहमतिमा ल्याउनुछ ।
प्रतिपक्षी एमालेसहितका दलहरु अख्तियार प्रमुख कार्कीलाई हटाउनुपर्ने पक्षमा दह्रो ढंगले उभिए पनि सत्तारुढ कांग्रेसले अझै निर्णय लिन सकेको छैन । तर, उसभित्र महाअभियोगको पक्षमा उभिने मत बलियो बन्दै गएको छ । स्रोतका अनुसार मंगलबारसम्म चार दिन बसेको कांग्रेस केन्द्रीय समिति बैठकमा महाअभियोगका पक्षमा धेरैले मत राखेका थिए ।
मंगलबारको संसद बैठकमा माओवादी केन्द्रका सांसद् महेन्द्रबहादुर शाहीले अख्तियार प्रमुख लोकमानसिंह कार्कीविरुद्धको महाअभियोग प्रस्ताव प्रस्तुत गरेका थिए । प्रस्तावका समर्थकसहित १५ जनाले महाअभियोग प्रस्तावमाथिको छलफलमा भाग लिए । जसमा कांग्रेस सांसद एवं स्वास्थ्यमन्त्री गगन थापा, सांसद रामहरि खतिवडा लगायतले महाअभियोग प्रस्तावको पक्षमा खुलेरै बोलेका थिए । उनीहरुले पार्टी नेतृत्वलाई चाँडो महाअभियोगको पक्षमा उभिन र अन्य सांसदलाई पारित गराउनमा सहयोग गर्न आग्रह पनि गरे ।
महाअभियोग प्रस्तावमा पहिलो दिन मंगलबार भाग लिने अधिकांश दलीय प्रतिनिधिले त्यसकै पक्षमा वकालत गरे । प्रतिपक्षी दल एमालेका रवीन्द्र अधिकारी, यज्ञ सुनुवार, मालेका महासचिव सीपी मैनाली, नेमकिपाकी सांसद अनुराधा थापामगर, जनमोर्चाकी मीना पुन लगायतले महाअभियोगको पक्षमा बोले ।
राप्रपा नेपालकी सांसद कुन्तीकुमारी शाही, फोरम लोकतान्त्रिकका जीतेन्द्रनारायण देव, नेपाल परिवार दलका सांसद एकनाथ ढकालले पनि महाअभियोगलाई सकारात्मक भनेका थिए ।
अब कार्तिक २५ गते दिउँसो २ बजे बस्ने संसद बैठकमा महाअभियोग प्रस्तावमाथिको प्रारम्भिक छलफलले निरन्तरता पाउने छ । मंगलबार नै झन्डै ४० जनाले बोल्नका लागि नाम टिपाइसकेका संसद सचिवालयका प्रवक्ता गौतमले बताए ।
प्रारम्भिक छलफल सकेपछि प्रस्ताव महाअभियोग सिफारिस समितिमा जानेछ । कांग्रेस, एमाले, माओवादी, राप्रपा नेपालका प्रतिनिधि रहेको सिफारिस समितिले आफ्नो कार्यविधिसमेत तयार पारिसकेको जनाएको छ ।
कान्तिपुरबाट
कार्तिक ९ गते, २०७३ मा प्रकाशित
