कांग्रेसमा स्थानीय निर्वाचनको लागि प्रमुख पदहरुमा अवसर दिन महिलाहरुको दबाब
चैत्र १६ गते, २०७३ मा प्रकाशित
कानुनले नै स्थानीय तहको निर्वाचनमा कम्तीमा ४० प्रतिशत महिला सहभागिता सुनिश्चित गरेपछि राजनीतिक दलहरुमा महिला उम्मेदवार चयनको कसरत बढेको छ ।
महिला नेत्रीहरुले स्थानीय तहका प्रमुख पदहरुमा पनि महिला उम्मेदवार बनाउन दबाब दिन थालेका छन् ।
संसदको सबैभन्दा ठूलो दल नेपाली कांग्रेसभित्र स्थानीय तहका प्रमुख पदहरुमा पनि महिलालाई उम्मेदवार बनाउन दबाब बढेको छ ।
कांग्रेसले महिला, मधेसी, आदिवासी जनजातिलगायत सबैपक्षको उम्मेदवारीलाई सुनिश्चितता गर्दै हिमाल, पहाड र तराईबीचको सहिष्णुता नै मुख्य एजेन्डा बनाएर निर्वाचनमा जाने बताएको छ ।
वैशाख ३१ गते हुने निर्वाचनमा सातजना जनप्रतिनिधि चयन गर्न मत हाल्न पाउने व्यवस्था छ ।
त्यसमध्ये नगरपालिकाको प्रमुख वा उपप्रमुख र गाउँपालिकाको अध्यक्ष वा उपाध्यक्ष मध्ये एकजना महिला उम्मेदवार अनिवार्य गरिएको छ । वडामा लड्ने एकजना दलित महिलासहित दुई महिला सदस्य हुनुपर्ने व्यवस्था छ ।
प्रमुख वा उपप्रमुखमध्ये एक महिला हुनुपर्ने व्यवस्था भएपछि उपप्रमुख पदमामात्र महिलालाई उम्मेदवार बनाउँछन् भन्ने आंशकाले महिलालाई चिन्तित बनाएको छ ।
सत्तारुढ नेपाली कांग्रेसभित्रका महिलाले उपप्रमुख र उपाध्यक्षमात्र नभइ अध्यक्ष वा प्रमुखमा नै उम्मेदवार बनाउन नेतृत्वलाई दबाब दिएका छन् ।
कांग्रेस केन्द्रीय सदस्य सरिता प्रसाइँ महिलालाई दर्बिलो ढंगबाट उम्मेदवार बनाउन आफूहरुले स्थानीय तहैदेखि दबाब दिइरहेको बताउँछिन् ।
मधेसबाट प्रतिनिधित्व गर्ने अर्का महिला केन्द्रीय सदस्य किरण यादव पनि संविधानले व्यवस्था गरे जसरी महिला, मधेसी, जनजाति, दलितले नै स्थानीय तहमा शासन गर्ने समय आएको बताउँछिन् । इमेजखबरमा समाचार छ ।
चैत्र १६ गते, २०७३ मा प्रकाशित
