विश्वको सर्वोच्च शिखर सगरमाथा आरोहणका लागि सबैभन्दा बढी आरोहीले अनुमति लिएका छन् ।
पर्यटन विभागका सूचना अधिकारी दुर्गादत्त ढकालकाअनुसार मंगलबारसम्ममा सगरमाथा आरोहणका लागि ३९ समूहका ३६५ जनाले आरोहण अनुमति लिएका छन् ।
सो संख्या अहिलेसम्मकै बढी भएको उनले बताए । गत वर्ष कुल ३४ समूहका २८९ जनाले आरोहणको अनुमति लिएका थिए ।
यस वर्ष अनुमति लिनेक्रम चलिरहेको छ, वैशाख मध्यसम्म अनुमति लिन सकिने भएकाले संख्या अझै बढ्नसक्छ ढकालले भने ।
पर्यटन विभागबाट अनुमति लिएकामध्ये मंगलबारसम्ममा ३१ समूहका २९४ जना आरोही सगरमाथा प्रदूषण नियन्त्रण समिति (एसपीसीसी)को कार्यालय नाम्चेबाट अनुमति लिएर आधार शिविरतर्फ लागेका छन् ।
आरोही काठमाडौंबाट लुक्लासम्म हवाईजहाजमा तथा त्यहाँबाट नाम्चे पुगी एसपीसीसीको कार्यालयबाट अनुमति लिएर आधार शिविरतर्फ जाने गर्दछन् ।
केही आरोही दोलखाको जिरी हुँदै पैदल तथा सल्लेरीसम्म सडकमार्गबाट भएर त्यहाँबाट आधार शिविरतर्फ जाने गरेका छन् ।
यस वर्ष आरोहीको संख्या अत्याधिक भएपछि सगरमाथामा ट्राफिक जाम हुने सम्भावना बढेकाले आरोहणका लागि कुशल व्यवस्थापनमा लागेको सगरमाथा आरोही संघका अध्यक्ष आङ छिरिङ शेर्पाले बताए ।
यस वर्ष आरोहीको संख्या बढी भएकाले व्यवस्थापनमा विशेष ध्यान दिएका छौं उनले भने । रासस
बैशाख ६ गते, २०७४ मा प्रकाशित
