नेपाली तथा हिन्दुहरुको महान् पर्व बडादसैं नजिकिँदै गर्दा रोजगारीका लागि भारत गएकाहरु घर फर्कनेक्रम बढिरहको छ ।
पश्चिम नेपालको रुपेडियालगायतका नाकाबाट नेपालीहरु फर्किरहेका छन् । विगतका वर्षहरुमा सीमानाकामा लुटपाटका घटना बढी हुने गरेको भएपनि यस वर्ष भने खासै समस्या झेल्नुनपरेको यात्रीहरुले बताएका छन् ।
यतिबेला बाँकेको रुपेडिया नाका भइ घर फर्कने नेपालीहरुको लावालस्कर नै देखिन्छ ।
अरुबेला जे–जस्तो भएपनि मुख्य चाडबाडको बेलामा घर फर्किनुपर्छ भन्दै दैनिक १५ सयभन्दा बढीको संख्यामा यस नाका भइ यात्रीहरु फर्किरहेका छन् ।
वर्षभरिको अनुभव, दुःख परिवारसँग साट्ने, टीका लगाइ मान्यजनबाट आशीर्वाद ग्रहण गर्ने र मीठो खाने पर्वकारुपमा धेरैले दसैंलाई लिने गरेका छन् ।
घर फर्कंदा अधिकांशले सीमानाकामा ठूल्ठूला समस्या झेल्नुपर्ने बाध्यता थियो । तर, यसपटक भने सीमानाकामा खासै समस्या नरहेको यात्रीहरु बताउँछन् ।
भारतमा कामका लागि गएका नेपालीहरु फर्कनेक्रममा नलुटिउन् भनेर नेपाली प्रहरी सादा पोसाकमा भारतीय बजार रुपेडियाको बस स्टेसनसम्म पुगी निगरानी गरेको इलाका प्रहरी कार्यालय जमुनाहाका इन्चार्ज शिव ओली बताउँछन् ।
यसैगरी, रुपन्देहीको बेलहिया, कन्चनपुरको गड्डाचौकी र कैलालीको गौरीफन्टालगायतका नाकामा पनि सुरक्षा अवस्था कडा पारिएको छ ।
घर फर्कने नेपालीको चाप बढ्नेबित्तिकै बाटोमा लट्ठीने खानेकुरा खुवाएर वा सुँघाएर लुटपाट गर्ने गिरोह सक्रिय हुने गर्दछन् ।
त्यतिमात्र होइन, विगतमा घर फर्कने नेपालीलाई भारतीय अधिकारीहरुले पनि चेकजाँकका नाममा अनावश्यक दुःख दिने गरेका थिए ।
तर, अहिले भने नेपाल प्रहरीले भारतीय प्रहरीसँग मिलेर घर फर्कने नेपालीको सुरक्षाका लागि समन्वय गरेर अघि बढेका छन् ।
नेपाल प्रहरीले नाकामा यात्री सहयाताकक्ष स्थापना गरेको छ भने भारततर्फ पनि नागरिक सहायताकक्ष स्थापना गरिएको छ । इमेजखबरमा समाचार छ ।
आश्विन १८ गते, २०७५ मा प्रकाशित
