लोकदोहोरी गायक पशुपति शर्माको विवादित बनेको पछिल्लो गीत ‘लुट्न सके लुट…’ ले संसदमा पनि चर्चा पाएको छ ।
प्रतिनिधिसभाको सोमबार बसेको बैठकको शून्य समयमा प्रमुख प्रतिपक्ष दल नेपाली कांग्रेसका सांसद अमरेशकुमार सिंहले लोकदोहोरी गायक पशुपति शर्माको हालै सार्वजनिक गीतलाई रोक लगाउनु लोकतान्त्रिक अधिकार हनन् भएको आरोप लगाए ।
सांसद सिंहले गायक शर्मालाई २५ हजार रुपैयाँ पुरस्कार दिने घोषणासमेत गरे ।
सांसद सिंहको भनाइको प्रतिवादमा सत्तारुढ दलका सांसद झपड रावलले गायक पशुपति शर्माको गीतमा सरकारले कुनैपनि प्रतिबन्ध नलगाएको जिकिर गरे ।
पाठकमाथि कानुनी कारबाही गर्न माग
शून्य समयमा भाग लिँदै सांसद गणेशकुमार पहाडी र अमृता थापाले संवैधानिक पदमा रहेर भ्रष्टाचार गर्ने व्यक्तिले पदबाट राजीनामा दिँदैमा छुट पाउन नहुने भन्दै अख्तियार दुरुपयोग अनुसन्धान आयोगका आयुक्त राजनारायण पाठकमाथि कानुनी कारबाही गर्न माग गरे ।
सांसद घनश्याम खतिवडाले मोरङमा ठेकेदारले बाटो निर्माणमा गरेको ढिलासुस्ती र कमसल निर्माणले जनताले दुःख पाएको भन्दै त्यस्ता ठेकेदारमाथि कडा कारबाही गर्न माग गरे ।
सांसद अमनलाल मोदीले किसानलाई सहज र सुलभरुपमा मलको व्यवस्था गराउन सरकारको ध्यानाकर्षण गराए ।
सांसदहरु आशाकुमारी विक, इन्दुकुमारी शर्मा, उमा रेग्मी, कलिला खातुन, कृष्णप्रसाद दहाललगायतले समसामयिक विषयमा सरकारको ध्यानाकर्षण गराएका थिए । इमेजखबरमा समाचार छ ।
फाल्गुन ६ गते, २०७५ मा प्रकाशित
