– मनिश पाण्डे क्षेत्री
गोदावरी पत्रका रंगहरूमा
बसन्तको हरियाली उमंगहरूमा ।
सुनाखरीको मञ्जरीमा शोभित भईदिन्छु
सुगन्ध बनि समिर संगै फैलिदिन्छु ।
निरुपम हिमकणका दिप्तिहरुमा
जगत पद्धतिका सृष्टीहरुमा
गगन छुन कुहिरो बनी धर्ति भरिदिन्छु
प्रभात सँगै स्नेहको स्पर्श गरिदिन्छु ।
गहिराईभित्र सरोबरको जलकणहरुमा
जलधिको नागबेली तरगंहरुमा
रस बनी फुलहरूमा सुवास छरिदिन्छु
थोपा बनि मेघको छल्किदै झरिदिन्छु ।
कोकिलको सुमधुर स्वरलहरीमा
भोजपत्रको कोमल पल्लवीहरुमा
ऋतु सँगै बदलावको मुल बनिदिन्छु
अन्त्य सँगै प्रारम्भको जग खनिदिन्छु ।
प्रातको सितमणी टहकहरुमा
पर्वणीको चाँदनी चहकहरुमा
पवन बनि जगतमा प्राण छरिदिन्छु
चेतना बनि जिवात्मामा स्मृति भरिदिन्छु ।
सुगन्ध बनी समिर संगै फैलिदिन्छु ।
सुनाखरीको मञ्जरीमा सोभित भईदिन्छु ।
रस बनी फुलहरूमा सुवास छरिदिन्छु ।
थोपा बनि मेघको छल्किदै झरिदिन्छु ।
श्रावण १६ गते, २०७९ मा प्रकाशित
