गौशाला, काठमाडौं। काठमाडौंबाट प्राप्त समाचार अनुसार आफूले मन पराएको केटासँग विवाह गर्न नपाउँदा आज बिहान महोत्तरीमा एक युवतीले आत्महत्या गरेकी छन् । मृत्यु हुनेमा जलेश्वर नगरपालिका-५ मा बस्दै आएकी राजेन्द्र पाण्डेकी छोरी १९ वर्षीया खुश्वुकुमारी रहेको जिल्ला प्रहरी कार्यालय महोत्तरीले जनाएको छ ।
त्यस्तै सोमबार साँझ डाम्ही मडै गाविसमा एक युवकले विषादी सेवन गरी आत्महत्या गरेका छन् । घरायसी विवादका कारण हिजोसाँझ करिब ५ बजे डाम्ही मडै-१ बस्ने फूलो सिंहका छोरा ३० वर्षीय सुनिलकुमारले विष खाएर ज्यान गुमाएका हुन् ।
दुवै मृतकको शव परीक्षणका लागि जिल्ला अस्पताल जलेश्वरमा ल्याइएको प्रहरीले जनाएको छ ।
बुटवलको नेपालगन्ज रोडमा महिलाको शव भेटियो
बुटवल। बुटवलको नेपालगन्ज रोडमा रहेको जनप्रिय एन्ड लालकिरण होटलमा आज एक महिलाको बेबारिसे शव फेला परेको छ । होटलको कोठा नं १०७ मा अन्दाजी ३० वर्षीया महिलाको शव भेटिएको हो ।
मृत अवस्थामा भेटिएकी महिलालाई कसैले हत्या गरेको हुनसक्ने प्रहरीले जनाएको छ । तीन दिनअघि सो होटलमा भारत नौतुनहाका हविल नामक व्यक्ति आई कोठा बुक गरेको होटल सञ्चालक टीकाबहादुर खड्काले बताउनुभयो ।
कोठामा पत्नी पनि बस्न आउने बताएका उक्त व्यक्ति फागुन २२ गते कोठामै ती महिलासँग बसी ताला लगाई बाहिरिएर २३ गते होटलमा नआएको होटल सञ्चालक खड्काले जानकारी दिनुभयो ।
महिलालाई युवकले हत्या गरेको हुनसक्ने प्रहरीले जनाएको छ । शव अर्धनग्न अवस्थामा रहेको छ । महिलाको पहिचान हुन सकेको छैन ।
फाल्गुन २५ गते, २०६७ मा प्रकाशित
