कञ्चनपुर। कञ्चनपुरको भीमदत्तनगरमा रहेको महाकाली अञ्चल अस्पतालमा सर्पदंशबाट पीडित भै अस्पताल भर्ना भएका १० जनाको दुई महिनाको अवधिमै मृत्यु भएको छ । असार र साउन महिनामा उपचारका लागि अस्पताल पुगेका सर्पदंशका उक्त बिरामीको मृत्यु भएको हो ।
सघन कक्ष( आइसियु) मा राखेर बिरामीलाई उपचार गराउनुपर्ने भए पनि यहाँस्थित महाकाली अञ्चल अस्पतालमा सो सेवा नभएपछि ढिलो गरी उपचारका लागि आउने बिरामीको मृत्यु हुने गरेको महाकाली अञ्चल अस्पतालले जनाएको छ ।
वर्षायामसँगै विगतको वर्षका तुलनामा कञ्चनपुरमा सर्पको बिगबिगी बढेको छ । यस वर्षको वर्षायामसँगै सर्पदंशबाट पीडित ७२ जना अस्पताल भर्ना भएका थिए । अस्पतालमा उपचारका लागि ल्याइएका केहीलाई भारतीय सहरमा रिफर गरिएको र केही भने निको भएर घर गएको अस्पतालले जनाएको छ ।
भाद्र ५ गते, २०६८ मा प्रकाशित
