जेष्ठ २६ गते, २०६९ मा प्रकाशित
काठमाडौंको नयाँबजारमा आज विहान अनेरास्ववियु अमृत साइन्स क्याम्पसका उपाध्यक्ष वसन्त शाहीमाथि गोली हानिएको छ । गोली हानी गम्भीर घाइते भएका अस्कल इकाई कमिटीका उपाध्यक्ष शाहीको अहिले उपचार भैरहेको छ । घाँटी र कोखामा गोली लागि गम्भीर घाइते उनको महाराजगञ्जस्थित शिक्षण अस्पतालमा उपचार भैरहेको हो ।
गम्भीर अवस्थामा उनलाई नयाँबजार खुसिबुको ह्वाइटफिल्ड कलेज नजिकबाट उपचारका लागि अस्पताल लगिएको थियो । अखिलकै दुई पक्षबीच विवाद हुँदा गोली हानिएको आशंका प्रहरीको छ । विहान सवा ७ बजेको घटनामा संलग्न भएको आशंकामा प्रहरीले चार जनालाई नियन्त्रणमा लिएको छ ।
अस्कल स्ववियुका उपसभापति वीरबहादुर राउतको खुशिबुस्थित कोठामै शाहीलाई गोली हानिएको प्रहरीले जनाएको छ । घटनास्थल राउतको कोठाबाट यूएस मेड लेखिएको नाइन एमएमको म्याग्जिनसहितको पेस्तोल बरामद गरिएको छ । एउटा गोलीको खोका र दुई वटा लोड गरिएको गोली पनि प्रहरीले फेला पारेको छ । कोठाभित्रको डस्ना, तन्ना र सिरानीमा रगत लतपतिएको छ । अस्कल अनेरास्ववियु क्याम्पस इकाइ कमिटीको अस्ती शुरु भएको सम्मेलन विवादकै कारण स्थगित भएको थियो । इकाई अध्यक्षका लागि शाहीसहित धनप्रसाद उपाध्याय र कल्याण दाहाल पनि प्रतिष्पर्धामा थिए । यही विवादका कारण घटना भएको हुनसक्ने अनुमान प्रहरीको छ । गोली हानाहानमा सम्मेलनको विवाद पनि कारक हुनसक्ने विद्यार्थी नेताहरुले नै आशंका गरेका छन् ।
केही दिनअघि मात्र राजधानीको शंखमूलमा सर्वोच्च अदालतका न्यायाधीश रणबहादुर बमको गोली हानी हत्या गरिएको थियो । घटनामा संलग्न अपराधिको आजसम्म प्रहरीले पत्तो लगाउन सकेको छैन । RSS
अन्य समाचारहरु
