रकम अभावले इटलीमा मृत्यु भएका नेपालीको दाहसंस्कार हुनसकेन

कामको सिलसिलामा गत चैत १४ गते इटली पुगेका भट्टराईको उपचारको क्रममा असार १४ गते इटलीको एक अस्पतालमा मृत्यु भएपछि दाहासंस्कारका लागि रकम अभाव भएको उनका दाजु शालिकरामले बताए । उनले भाइको लास झिकाइदिन वा आर्थिक सहयोग उपलब्ध गराउन सरकारसँग माग गरेका छन् ।

भट्टराईको मृत्यु भएपछि इटलीमै दाहासंस्कार गर्न ७ सय युरो (७० हजार नेपाली रुपैयाँ) लाग्ने र नाता प्रमाणितसहित कागज पत्र पठाउन इटली दूतावासमार्फत परराष्ट्र मन्त्रालयले जिल्ला प्रशासनमा पत्रचार गरेको जिल्ला प्रशासन कार्यालयका प्रशासकीय अधिकृत प्रदीपज्योति श्रेष्ठले बताए । परिवारलाई त्यसबारे प्रहरीमार्फत जानकारी गराइएको उनले बताए ।

गत चैत १४ गते स्याङजाका क्षेत्रकुमार श्रेष्ठले काम गर्ने भिसा मिलाएर भट्टराईलाई इटली लगेको दाजु शालिग्रामले बताए । विदेश जानु पहिला घरमा हुँदा पत्थरीको अप्रेशन गराएको र पछि अप्रेशन बिग्रिन पुगेको शालिकरामले बताए । उनका अनुसार भाइमा जण्डिसको लक्षण समेत देखा परेको थियो । अविवाहित दुर्गा स्वास्थ्यमा सुधार आएपछि इटली गएका थिए ।