– कृष्ण खनाल
बुटवल । रुपन्देही ठेला व्यवसायी समिति रुपन्देहीले बुटवल नगरपालिका र पश्चिम क्षेत्रिय ट्राफिक प्रहरी कार्यालयमा बुधबार ज्ञापन पत्र पेश गरेको छ ।
सडक किनारबाट विस्थापित भएका उनीहरुले बैकल्पिक स्थानको माग गर्दै ज्ञापन पत्र पेश गरेका हुन । ज्ञापन पत्र बुझेपछि नगरपालिका र ट्राफिक प्रहरीले समस्याको समधानका लागि आफु कटिबद्ध रहेको बताएका थिए । ज्ञापन पत्र पेश गर्नुअघि समितिले बुटवलको बसपार्कबाट -याली निकालेको थियो । बसपार्क बाट निक्लेको -याली अस्पताल लाईन, ट्राफिक चोक, प्रहरी कार्यालय, नगरपालिका, अमरपथ हुदै पुनः बसपार्कमा आई कोठ सभामा परिणत भएको थियो ।
कोठ सभामा बोल्दै एमालेका मणि खनालले व्यवसायीहरुको रोजिरोटी कुनै पनि हालतमा कसैले खोस्न नहुने बताए । उनले व्यवसायीहरुलाई बैकल्पिक स्थानको माग तुरुन्त दिन नगरपालिकालाई समेत आग्रह गरे । त्यस्तै एकिकृत नेकपा माओवादीका प्रेम गुरुङ्ले रोजगारीलाई बेरोजगार गराउन नहुने बताए । उनले ट्राफिक प्रहरी, बुटवल नगरपालिका र आयोजकका गरी ३ जनाको कार्यदल बनाएर अघि बढेमा ५ दिन भित्रै समस्याको समधान निकाल्ने बताए । कार्यक्रममा नेकपा एकिकृतका सन्दीप सापकोटा, समितिका संयोजक मोतिलाल कंडेल लगाएले बोलेका थिए ।
समितिले भोली (बिहिबार) प्रमुख जिल्ला अधिकारी सामु ज्ञापन पत्र पेश गर्ने कार्यक्रम रहेको संयोजक कंडेलले जानकारी दिए ।
श्रावण २३ गते, २०७० मा प्रकाशित
