पर्सा वन्यजन्तु आरक्षबाट निस्केर बस्ती क्षेत्रमा प्रवेश गरेको बाघले आक्रमण गर्दा मंगलबार पर्सामा चारजना सुरक्षाकर्मीसहित १० जना घाइते भएका छन् ।
घाइतेमध्ये चारजनाको अवस्था गम्भीर रहेको छ । उनीहरुलाई थप उपचारका लागि काठमाडौं लगिएको छ ।
पर्साको रामनगरी र लखनपुर गाविसको बीचमा पर्ने खेतमा काम गरिरहेका सर्वसाधारणमाथि बाघले एक्कासि आक्रमण गरेको जनाइएको छ ।
सोलगत्तै घटनास्थल पुगेका इलाका प्रहरी कार्यालय पोखरियाका प्रहरी निरीक्षक चक्रबहादुर शाहसहित चारजना सुरक्षाकर्मी पनि बाघको आक्रमण परी घाइते हुन् ।
बाघको आक्रमणमा परी घाइते भएका अरु सर्वसाधारणको वीरगन्जको नारायणी उपक्षेत्रीय अस्पतालमा उपचार भइरहेको छ ।
मानवबस्तीमा पसेर आक्रमण गर्ने बाघलाई नियन्त्रणमा लिन नसकेपछि प्रहरीले गोली चलाएको र गोली लागेर बाघ मरेको बताइएको छ ।
मरेको बाघलाई वीरगन्जस्थित जिल्ला वन कार्यालयको जिम्मा लगाइएको प्रहरीले जनाएको छ ।
बाघलाई नियन्त्रणमा लिन जिल्ला वन कार्यालय, जिल्ला प्रहरी कार्यालय, सशस्त्र प्रहरी र राष्ट्रिय वनजन्तु आरक्षकको टोली परिचालित भएको थियो —-अनिल तिवारी (इमेज):
माघ २५ गते, २०७३ मा प्रकाशित
