आज देशभर बदली, वर्षा, चट्याङ्ग र हावाहुरीको सम्भावना

काठमाडौँ । जल तथा मौसम विज्ञान विभागले हाल नेपालमा उपल्लो वायुमण्डलमा रहेको पश्चिमी न्यून चापीय रेखा, स्थानीय वायु तथा पश्चिमदेखि पूर्वसम्म नेपाल नजिक सक्रिय न्यून चापीय प्रणालीको प्रभाव रहेको जनाएको छ । यस प्रणालीका कारण देशका अधिकांश क्षेत्रमा मौसम बदली भई वर्षाको सम्भावना रहेको छ ।

विभागका अनुसार हाल कोशी, मधेश, बागमती र गण्डकी प्रदेशमा पूर्णतया बदली रहेको छ भने लुम्बिनी, कर्णाली र सुदूरपश्चिम प्रदेशका हिमाली तथा पहाडी भू-भागमा सामान्य बदली रहेको छ । बाँकी तराई क्षेत्रहरूमा आंशिक बदली देखिएको छ । कोशी, लुम्बिनी, कर्णाली र सुदूरपश्चिम प्रदेशका एक-दुई स्थानमा मध्यम वर्षा भइरहेको विभागले जनाएको छ ।

आज दिउँसो देशभर सामान्यदेखि पूर्ण बदली रहनेछ । लुम्बिनी, कर्णाली र सुदूरपश्चिम प्रदेशका साथै कोशी, बागमती र गण्डकी प्रदेशका हिमाली तथा पहाडी भू-भागका केही स्थानहरूमा मेघगर्जन तथा चट्याङ्गसहित मध्यम वर्षाको सम्भावना रहेको छ । मधेश प्रदेशसहित कोशी, बागमती, गण्डकी, लुम्बिनी र सुदूरपश्चिमका तराई क्षेत्रमा पनि केही स्थानमा वर्षा हुन सक्ने जनाइएको छ ।

त्यसैगरी देशका पहाडी तथा तराई भू-भागका केही स्थानमा हावाहुरी चल्ने सम्भावना रहेकोले आवश्यक सतर्कता अपनाउन मौसमविद्ले आग्रह गरेका छन् ।

आज राति सुदूरपश्चिम प्रदेशसहित देशका हिमाली तथा पहाडी भू-भागमा सामान्य बदली रहनेछ भने अन्य क्षेत्रमा आंशिक बदली रहने पूर्वानुमान गरिएको छ । सुदूरपश्चिम, कर्णाली र गण्डकी प्रदेशका हिमाली तथा पहाडी भू-भागका थोरै स्थानहरूमा तथा कोशी, बागमती र लुम्बिनी प्रदेशका हिमाली क्षेत्रमा एक-दुई स्थानमा हल्का वर्षा वा हिमपातको सम्भावना रहेको विभागले जनाएको छ ।

मौसममा आएको परिवर्तनसँगै वर्षा, चट्याङ्ग तथा हावाहुरीबाट हुन सक्ने सम्भावित जोखिमलाई ध्यानमा राख्दै सतर्कता अपनाउन विभागले सर्वसाधारणलाई अनुरोध गरेको छ ।

#मौसमअपडेट #WeatherUpdate #RainAlert #नेपालमौसम #चट्याङ्ग #हावाहुरी #WeatherNews #arghakhanchicom #arghakhanchidotcom #arghakhanchicomHD