अमेरिकाको न्युयोर्कस्थित साउदन डिस्ट्रिक्ट कोर्टले नेपालीभाषी एक युवतीलाई श्रम शोषण गरेको अभियोगमा भारतीय विदेश मन्त्रालयकी एक उच्च कूटनीतिक अधिकारीलाई पन्ध्र लाख अमेरिकी डलर क्षतिपूर्ति भराउने फैसला सुनाएको छ ।
न्यायाधीश फ्र्यांक मासले सयुक्त राष्ट्रका लागि न्यूयोर्कस्थित भारतीय नियोगमा कार्यरत तत्कालीन प्रेस, संस्कृति, सूचना र सामुदायिक मामिलासम्बन्धि काउन्सुलर निना मलहोत्रा र उनका पति ईन्जिनियर जोगेश मलहोत्रालाई पीडित दार्जिलिङकी शान्ति गुरुङको मुद्दामा सो रकम भर्न आदेश दिएको हो ।
दार्जिलिङ सुकुनाकी गुरुङले २०६७ भदौंमा न्युयोर्कको फेडेरल कोर्टमा आफूलाई बाल श्रम शोषण र दास बनाएको लगायत २० अभियोगसहित हदैसम्मको कारवाहीको माग गरी मुद्दा हालेकी थिइन् । पीडित गुरुङको संरक्षणलगायत मुद्दामा साथ दिएको अधिकार संस्थाकी अधिकारकर्मी नर्वदा क्षेत्रीले अदालतको फैसलाबाट नैतिकरुपमा अमेरिकामा रहेका नेपाली भाषी महिलाहरुको जित भएको प्रतिक्रिया दिइन् ।
गुरुङले रीटमा १७ वर्षको उमेरमा अपहरण शैलीबाट आफूलाई मलहोत्रा दम्पतीले न्यूयोर्क पु-याएको र दासको रुपमा झण्डै साढे तीन बर्ष घरेलु कामदार बनाएको उल्लेख थियो ।
फाल्गुन १२ गते, २०६८ मा प्रकाशित
