आइपिएलको पहिलो क्वालिफायरमा आज बैंगलुरु र गुजरात आमने सामने

काठमाडौँ । इन्डियन प्रिमियर लिग (आईपीएल) को पहिलो क्वालिफायरमा रोयल च्यालेन्जर्स बैंगलुरु र गुजरात टाइटन्सबीच आज फाइनल प्रवेशका लागि कडा प्रतिस्पर्धा हुने भएको छ । यो खेल जित्ने टोली सिधै फाइनलमा पुग्नेछ र दोस्रो उपाधितर्फको यात्रा नजिक बनाउनेछ ।

रोयल च्यालेन्जर्स बेंगलुरु गत सिजनको उपाधिपछि लगातार राम्रो लयमा देखिएको छ । उसले लगातार दोस्रो उपाधि जित्ने तीन क्लबमध्ये एक बन्ने अवसर पाएको छ । उता गुजरात टाइटन्स भने छोटो समयमै लगातार उत्कृष्ट प्रदर्शन गर्दै चौथो सिजनमै अर्को उपाधि जित्ने लक्ष्यमा छ ।

दुवै टोलीबीच यस सिजन भएका भेटमा बराबरी प्रतिस्पर्धा देखिएको छ । एक खेलमा बेंगलुरुले जित निकालेको थियो भने अर्को खेलमा गुजरातले उत्कृष्ट रनचेज गर्दै जवाफ फर्काएको थियो । दुवै टोलीले आ–आफ्नो घरेलु मैदानमा जित निकालेकाले धर्मशालामा हुने यो तटस्थ खेलमा कुनै स्पष्ट फाइदा छैन ।

धर्मशालास्थित एचपीसीए मैदान ब्याटिङमैत्री मानिन्छ । यहाँ उच्च स्कोरको सम्भावना रहने भएकाले गुजरातले आफ्नो बलियो शीर्षक्रमको ब्याटिङमा भरोसा गर्नेछ भने बेंगलुरुले आफ्नो अनुशासित बलिङमार्फत खेल नियन्त्रण गर्ने योजना बनाएको छ ।

बेंगलुरुका लागि विराट कोहलीले यस सिजनमा ५५७ रनसहित प्रमुख आधार बनेका छन् । देवदत्त पडिक्कल आक्रामक लयमा छन् भने बलिङमा भुवनेश्वर कुमारले २४ विकेटसहित राम्रो प्रदर्शन गरेका छन् ।

गुजराततर्फ कप्तान शुभमन गिल र साई सुदर्शनले ओपनिङमा बलियो साझेदारी बनाइरहेका छन् । जोस बटलर तेस्रो नम्बरमा भरपर्दा देखिएका छन् भने जेसन होल्डरले अलराउन्डरका रूपमा टोलीलाई सन्तुलन दिएका छन् ।

धर्मशालाको मैदान करिब १ हजार ५ सय मिटर उचाइमा रहेकाले यहाँ बल छिटो बाउन्ड्री बाहिर जाने र ब्याटिङ सहज हुने गर्छ । साँघुरा बाउन्ड्री र हल्का हावाका कारण ठूला स्कोर बन्ने सम्भावना बढी हुन्छ । सुरुवातमा बलरले केही स्विङ पाउन सक्छन् भने पछि ड्युका कारण बल नियन्त्रण गर्न कठिन हुने गर्छ।

यी दुई टोलीबीचको इतिहास पनि निकै रोचक छ। अहिलेसम्मका ८ भेटमा दुवैले ४–४ खेल जितेका छन्। उच्चतम स्कोर पनि लगभग बराबरी छ—बेंगलुरुले २०६ र गुजरातले २०५ रन बनाएको छ, जसले प्रतिस्पर्धा कति नजिक छ भन्ने देखाउँछ ।

यस खेलमा बेंगलुरुको सम्भावित टोलीमा विराट कोहली, फिल साल्ट, देवदत्त पडिक्कल, राजत पाटीदार (कप्तान), जितेश शर्मा (विकेटकिपर), क्रुनाल पाण्ड्या, रोमारियो शेफर्ड, भुवनेश्वर कुमार, जोश हेजलवुड र सुयश शर्मा रहन सक्ने छन् । त्यस्तै इम्प्याक्ट खेलाडीका रूपमा वेंकटेश ऐयर वा रासिख सलाम दार प्रयोग हुन सक्छन् ।

गुजरात टाइटन्सको सम्भावित टोलीमा साई सुदर्शन, शुभमन गिल (कप्तान), जोस बटलर (विकेटकिपर), वासिङ्टन सुन्दर, जेसन होल्डर, राहुल तेवातिया, राशिद खान, कागिसो रबाडा, अर्शद खान, मोहम्मद सिराज र प्रसिद्ध कृष्णा रहनेछन् । त्यस्तै इम्प्याक्ट खेलाडीका रूपमा निशान्त सान्डु वा शाहरुख खान प्रयोग हुन सक्नेछ ।