२३ वैशाख, दमक । झापा दमकस्थित आम्दा अस्पतालमा एक बिरामीले आत्महत्या गरेका छन् । बेलडाँगी- १ सेक्टर बी वान छाप्रा नम्बर ८४/८५ का क्षयरोगका बिरामी ३६ वर्षीय कीर्तिमान राईले मंगलवार विहान उपचार क्रममा आत्महत्या गरेका हुन् ।
क्षयरोगको उपचार गरिरहेको कोठा नम्बर १२ मा कुरुवा नभएको बेला उनले आत्महत्या गरेको इलाका प्रहरी कार्यालय दमकले जनाएको छ । शव परीक्षणका लागि मोरङको उर्लाबारीस्थित मङ्गलबारेको प्राथमिक स्वास्थ्य केन्द्र पठाइएको प्रहरीले जनाएको छ ।
चार महिनाअघिदेखि अस्पतालमा बसेर क्षयरोगको औषधि खाइरहेका राई सोमबार मात्र घर गएर आएको उनका दाजु कुबेरप्रसादले बताए । अस्पतालका मेडिकल सुपरिटेन्डेन्ट डा नवीन ढकालले मानसिक तनावका कारण बिरामीले आत्महत्या गरेको हुन सक्ने बताए । रासस
बैशाख २३ गते, २०७१ मा प्रकाशित
