वीरगंज । वीरगञ्ज माईस्थान निवासी ७० बर्षिय श्याम नारायण बर्णवालको कोरोना संक्रमणको कारण मृत्यु भएको पुष्टि भएको छ ।
गत सोमबार बीरगंजको एडभान्स मेडिकियर अस्पतालमा श्वासप्रश्वासमा समस्या देखिएपछि भर्ना भएका बर्णवाललाई तत्काल कोरोना संक्रमणको आशंकामा नारायणी अस्पताल अन्तर्गतको गण्डक अस्थायी कोभिड अस्पतालमा भर्ना गरिएको थियो ।
उपचारको क्रममा बर्णवालको मंगलबार साँझ मृत्यु भएको गण्डक कोभिड अस्पतालले जनाएको छ ।
मृत्युपछि उनको स्वाब संकलन गरी नारायणी अस्पतालको प्रयोगशालामा पीसीआर परिक्षणगर्दा गएराति आएको रिपोर्टमा बर्णवाललाई कोरोना पोजेटिभ देखिएको नारायणी अस्पतालका मेडीकल सुपरीटेण्डेन्ट डाक्टर मदन उपाध्यायले जानकारी दिनुभयो ।
वर्णवालको कोरोना संक्रमणको कारण मृत्यु भएको पुष्टि भएसंगै नेपालमा कोरोनाका कारण मृत्यु हुनेको संख्या ४३ पुगेको छ ।
मृतकको शव व्यबस्थापनको तयारी नेपाली सेनाले गरिरहेको उपाध्यायले बताउनुभयो ।मृतकमा अन्य कुनै स्वास्थ्य समस्या नरहेको र बर्णवालको ट्राभल हिष्ट्री पनि नभएको अबस्थामा ‘कोरोना संक्रमणकै कारण मृत्यु भएको यो घटनाले बीरगंजमा कोरोना समुदायमा गइसकेको डाक्टर उपाध्यायले बताउनुभयो ।
यसैगरी,नारायणी अस्पतालको प्रयोगशालामा गरिएको परिक्षणको क्रममा गएराति सार्वजनिक भएको रिपोर्ट अनुसार मृतक बर्णवाल सहित १७ जनामा कोरोना संक्रमण पुष्टि भएको छ ।
नारायणी अस्पतालको प्रयोगशाला प्रमुख डा.नीरा पाठकको अनुसार १ सय २८ वटा नमुना जाँच गरिएकोमा ४ महिलासहित १७ जनामा कोरोना संक्रमण पुष्टि भएको हो ।
जस मध्ये वीरगंज नारायणी अस्पतालकै एक ४० वर्षिय चिकित्सकसहित अर्का ६२ बर्षिय चिकित्सक गरी २ जनामा कोरोना संक्रमण पुष्टि भएको छ ।
कोरोना पुष्टि भएका २ चिकित्सक सहित १६ जनालाई नारायणी अस्पतालको अस्थायी कोरोना गण्डक अस्पतालको आईशोलेशनमा उपचारकालागी पु¥याईएको नारायणी अस्पतालका मेडीकल सुपरीटेण्डेन्ट डाक्टर मदन उपाध्यायले बताउनुभयो ।
बीरगंज लगायत बारा,पर्सामा कोरोना संक्रमण समुदायमा पुगेपछि पुनः लकडाउनकालागी स्थानिय प्रशासनलाई सिफारीश गरिएको मेडीकल सुपरीटेण्डेन्ट डाक्टर उपाध्यायले बताउनुभयो ।
यसैबिच बीरगंजमा अबस्था जटिल देखिएको र पुनः लकडाउन गर्ने सम्बन्धमा जिल्ला बिपत व्यबस्थापन समिति तथा सुरक्षा समितिको बैठक आजै बस्ने र साँझ सम्म ठोस निर्णय लिईने पर्साका प्रमुख जिल्ला अधिकारी बिष्णु कार्कीले बताउनुभयो ।
गण्डक अस्थायी कोभिड अस्पतालमा यसअघि ६ महिला र २३ पुरुष गरी कुल २९ जना संक्रमित उपचार भईरहेकोमा थप १६ जना संगै संक्रमितको संख्या ४५ पुगेको छ ।
जिल्ला जनस्वास्थय कार्यालय पर्साका जनस्वास्थ्य निरीक्षक जयमोद ठाकुरले कोरोना समुदायमा फैलिसकेकोले अब सबै संयन्त्र मिलेर काम गर्नुको बिकल्प नरहेको बताउनुभयो ।
पर्साका विभिन्न सरोकारवाला निकायसंग सहकार्य र समन्वय राम्रोसंग हुन नसक्दा कन्ट्रयाक ट्रेसिङ,संक्रमित ओसार पसार,नमुना संकलन लगायतको कामाम बाधा सृजना भइरहेको ठाकुरले बताउनुभयो । रेडियो नेपाल
श्रावण ८ गते, २०७७ मा प्रकाशित
