प्रधानमन्त्री झलनाथ खनालले पूर्व घोषणा अनुसार आज राजीनामा दिने

काठमाडौमा रिपोर्टर्स क्लबको साक्षात्कारमा प्रमुख सल्लाहकार ज्वालाले सहमतिको आधार निर्माणको लागि प्रधानमन्त्रीले राजीनामाको घोषणा गरेको भन्दै शनिबारसम्म सहमति नबने राजीनामा दिने स्पष्ट पारे ।

‘सहमति नबने राजीनामा दिनु हुन्छ । दलहरुवीच सहमति भए सहमति अनुसार नै गर्नु हुन्छ । अब प्रधानमन्त्री टाँसिएर बसिरहने पक्षमा हुनु हुन्न,’ उनले भने, ‘प्रधानमन्त्री राजीनामा गर्ने प्रतिबद्धतामा दृढ हुनु हुन्छ ।’

सहमतिको सरकार निर्माण गर्ने, शान्ति प्रक्रिया निष्कर्षमा पुर्‍याउने र संविधान निर्माण गर्ने मिसनमा प्रधानमन्त्री झलनाथ खनाल नेतृत्वको सरकार असफल भएको स्वीवकार गर्दै उनले शनिबारसम्म शान्ति प्रक्रिया अगाडि बढाउने र सहमतिको सरकार निर्माण गर्ने सम्बन्धमा ठोस सहमति बन्ने दावी गरे ।

‘दलहरुवीच गहन छलफल भइरहेको छ । भोलिसम्म शान्ति र सहमतिको सरकारको विषयमा सहमति बन्न सक्छ,’ उनले भने ।