प्रधानमन्त्री खनालले सोमबार बस्ने संसदको बैठकबाट राष्ट्रका नाउँमा सम्बोधन गरी राजीनामा घोषणा गर्ने

सल्लाहकार पौडेलले भने- ‘शान्ति प्रक्रिया बारे सहमति नजुटेमा प्रधानमन्त्रीले संसदको अर्को बैठकमा राष्ट्रका नाममा सम्बोधन गरी राजीनामा घोषणा गर्नेछन्।’ बैठकमा प्रधानमन्त्रीको प्रस्तावमा सहमति जुट्ने सम्भावना छैन। शुक्रबार बसेको माओवादी पदाधिकारी बैठकले शान्ति प्रक्रिया बारे कुनै धारणा प्रस्तुत गर्न जरुरी नभएको र राजीनामाको विषय प्रधानमन्त्रीको विवेकको कुरा भएको निर्णय गरेको थियो। माओवादी निर्णयपछि प्रधानमन्त्रीको अवस्था कमजोर बनेको हो।

प्रधानमन्त्रीले शान्ति प्रक्रिया बारे ठोस सहमति नजुटेमा साउन २८ भित्र राजीनामा गर्ने भनी संसदमा यसअघि घोषणा गरिसकेका छन्। संसदको अर्को बैठक सोमबार ३ बजेका लागि तोकी सकिएको छ।