दलहरू श्रृंखलाबद्ध बैठकमा: कांग्रेस-एमाले सीमित कार्यकारी अधिकारसहितको जनताले चुनेको राष्ट्रपति हुने मिश्रित प्रणाली स्वीकार्न तयार

ठूला दलले ३८५ सदस्यीय संघीय व्यवस्थापिका बनाउने सहमति गरेका छन्। त्यसअनुसार प्रतिनिधिसभा ३२५ र राष्ट्रिय सभा ६० सदस्यीय हुनेछ।
निर्वाचन क्षेत्र भने जम्मा १८० वटा हुनेछ। समानुपातिकबाट ४५ प्रतिशत मनोनित गर्ने गरी १४५ जनाको सिट राख्ने सहमति भएको हो।
राष्ट्रिय सभामा ६० सदस्य हुनेछन् जसमध्ये ५० प्रदेशहरूबाट चुनिएर आउने र १० जना राष्ट्रिय जीवनमा ख्यातिप्राप्तमध्येबाट सरकारले मनोनित गर्नेछ।
संविधानसभामा रहेका सबै दलका प्रतिनिधिसँग ठूला चारका नेताहरूसहित माओवादी अध्यक्ष दाहालले मंगलबार यसबारे जानकारी दिएका हुन्।
सात प्रदेश हुने सम्भावना रहेकाले प्रत्येकबाट सात-सात जनाका दरले ४९ जना आउनेसम्मको ब्रिफिङ एमालेको बैठकमा गरिएको सभासद रामनाथ ढकालले जानकारी दिए।
साना दलले भने समानुपातिकतर्फ संविधानसभा चुनावमै ५८ प्रतिशत राखिएकाले त्यसलाई घटाउन नहुने दबाब दिइरहेका छन्। सर्वदलीय बैठकपछि सभासद् प्रेमबहादुर सिंहले सञ्चारकर्मीस”ग भने, ‘अहिलेको मुद्दा समावेशी हो, समानुपातिक घटाउँदा समावेशी हुनसक्दैन।’
प्रदेश सभाबारे भने छलफल जारी छ। यसअघि संविधानसभाको विषयगत समितिले प्रदेशसभा बढीमा ३५ जनाको बनाउने निर्णय गरेको थियो। त्यसअनुसार १७ जना समानुपातिक र १८ जना प्रत्यक्षतर्फका हुने छन्।