बैशाख ३१ गते, २०८३ मा प्रकाशित
-अर्घाखाँची डट्कम ।
अर्घाखाँची जिल्लाको सन्धिखर्क नगरपालिका वडा नम्बर २ चुत्राबेसीमा रहेको जनज्योति माध्यमिक विद्यालय ले यस वर्षको माध्यमिक शिक्षा परीक्षा (एसइई) मा उत्कृष्ट सफलता हासिल गरेका विद्यार्थीलाई विशेष कार्यक्रमका बीच सम्मान गरेको छ ।
विद्यालय परिसरमा आयोजित कार्यक्रममा ४.०० जिपिए प्राप्त गर्दै अर्घाखाँची जिल्लामै प्रथम हुन सफल विदुषी खड्का सहित उत्कृष्ट नतिजा हासिल गर्ने विद्यार्थीलाई सम्मान गरिएको हो । सम्मानित विद्यार्थीलाई दोसल्ला, प्रशंसापत्र तथा मायाको चिनो प्रदान गरिएको थियो ।
कार्यक्रममा पूर्व कमल भुसाल, सन्धिखर्क नगरपालिकाको शिक्षा शाखा प्रमुख मञ्जु आचार्य, विद्यालयका प्रधानाध्यापक माधव प्रसाद आचार्य, पूर्व विद्यार्थी लक्ष्मण पराजुली, शिक्षक, अभिभावक, विद्यार्थी तथा स्थानीय बुद्धिजीवीहरूको उल्लेखनीय उपस्थिति रहेको थियो ।
कार्यक्रमलाई सम्बोधन गर्दै कमल भुसालले विदुषी खड्काले हासिल गरेको ४ जिपिएको उपलब्धि विद्यालय मात्र नभई समग्र अर्घाखाँचीकै गौरवको विषय भएको बताउनुभयो । उहाँले ग्रामीण क्षेत्रका सामुदायिक विद्यालयले पनि गुणस्तरीय शिक्षा प्रदान गर्न सक्छन् भन्ने उदाहरण जनज्योति माविले प्रस्तुत गरेको उल्लेख गर्नुभयो ।
त्यस्तै शिक्षा शाखा प्रमुख मञ्जु आचार्यले सामुदायिक विद्यालयप्रतिको विश्वास बढ्दै गएको बताउँदै जनज्योति माविको सफलताले सम्पूर्ण जिल्लालाई प्रेरणा दिएको धारणा व्यक्त गर्नुभयो । विद्यालय प्रशासन, शिक्षक, अभिभावक र विद्यार्थीबीचको सहकार्यकै कारण यस्तो ऐतिहासिक सफलता सम्भव भएको उहाँको भनाइ थियो ।
प्रधानाध्यापक माधव प्रसाद आचार्यले विद्यालयले पछिल्ला वर्षहरूमा शैक्षिक गुणस्तर सुधारका लागि योजनाबद्ध रूपमा काम गर्दै आएको जानकारी दिनुभयो । नियमित पठनपाठन, अतिरिक्त कक्षा, अभिभावकसँगको समन्वय तथा अनुशासित शैक्षिक वातावरणका कारण यस वर्ष उल्लेखनीय सफलता हासिल भएको उहाँले बताउनुभयो ।
पूर्व विद्यार्थी लक्ष्मण पराजुलीले आफ्नो पुरानो विद्यालयले जिल्ला प्रथम विद्यार्थी उत्पादन गरेकोमा गर्व लागेको बताउँदै विद्यालयको भौतिक तथा शैक्षिक विकासमा पूर्व विद्यार्थीहरूको सहयोग निरन्तर रहने प्रतिबद्धता व्यक्त गर्नुभयो ।
सम्मानित विद्यार्थी विदुषी खड्काले आफ्नो सफलताको श्रेय शिक्षक, अभिभावक तथा विद्यालयले उपलब्ध गराएको शैक्षिक वातावरणलाई दिनुभएको थियो । निरन्तर मेहनत, समय व्यवस्थापन र आत्मविश्वासका कारण सफलता हासिल गर्न सकेको उहाँले बताउनुभयो ।
एसइईमा जिल्ला प्रथम बन्न सफल विदुषी खड्काले आफूलाई निरन्तर प्रेरणा र मार्गदर्शन गर्ने शिक्षकहरूप्रति सम्मान प्रकट गर्दै खादा ओढाएर सम्मान गरेकी थिइन् ।
यस वर्षको एसइई परीक्षामा जनज्योति माध्यमिक विद्यालयले हासिल गरेको उल्लेखनीय सफलताले सामुदायिक विद्यालयहरूमा पनि उच्चस्तरीय शैक्षिक उपलब्धि सम्भव छ भन्ने सशक्त सन्देश दिएको स्थानीयहरूको भनाइ छ ।
#SEE2026 #VidushiKhadka #JanajyotiSchool #Sandhikharka #Arghakhanchi #EducationNews #SEETopper #CommunitySchool #NepalEducation #arghakhanchicom #arghakhanchidotcom #arghakhanchicomHD
अन्य समाचारहरु
