-गोपाल प्रसाद भट्टराई, अर्घाखाँची ।
बैशाख–२३,अर्घाखाँची – “गणतन्त्रको रक्षा, प्रतिगामी खतराको बिरुद्ध संघर्ष र संघियताको खारेजीका निम्ती राष्ट्रिय जनमोर्चा अर्घाखाँचीले नागरिक सचेतना अभियान संचालन गर्नेभएको छ ।
पार्टीको केन्द्रिय कार्यक्रम अनुसार बैशाख २६ गतेदेखि ३१ गते सम्म राजमोले जिल्लाभर यो अभियान संचालन गर्ने भएको हो ।
सोमबार सन्धिखर्कमा पत्रकार सम्मेलन गर्दै उक्त पार्टीले “गणतन्त्रको रक्षा, प्रतिगामी खतराको बिरुद्ध संघर्ष र संघियताको खारेजीका निम्ती १ हप्ते कार्यक्रम सार्वजनिक गरेको छ ।
प्रतिगामी शक्तिका कारण अहिले पनि नेपालको व्यवस्था अप्ठ्यारोमा परेको निष्कर्ष सहित देशभर राजमोले जागरण अभियान संचालन गर्न लागेको उहाँको भनाई छ । जस अनुसार राजमो अर्घाखाँचीले बैशाख २६ गते मालारानीको हंसपुरमा जनसभा गर्ने भएको अध्यक्ष थम्मन के.सी.ले जानकारी दिनुभएको छ ।
अध्यक्ष के.सी.का अनुसार बैशाख २७ गते भूमिकास्थानको ढाकावाङ्ग पिपलनेटामा, बैशाख ३० गते सन्धिखर्कको शान्ति बगैंचामा र बैशाख ३१ गते भूमिकास्थान नगरपालिकाको खिल्जी र असुरकोटको संगम स्थल उदयठाँटीमा जनसभा गर्ने छ ।
यि सबै कार्यक्रममा नेकपा मसाल लुम्बिनीका प्रवक्ता तिलक जि.सी. सहित जिल्लाका शिर्षस्थ नेताहरुको सम्बोधन रहने राजमो अर्घाखाँचीले जनाएको छ । राजमो जिल्ला कोषाध्यक्ष गोविन्द वि.सी.को स्वागत मन्तव्य र सचिव बाबुराम पन्थीको संचालनमा सम्पन्न पत्रकार सम्मेलनमा अध्यक्ष के.सी.ले कार्यक्रमको बारेमा जानकारी गराउनुभएको हो ।
नेकपा मसालका जिल्ला प्रवक्ता पशुपति ढकाल, राजमो जिल्ला सचिवालय सदस्य कमल प्रसाद घिमिरे, अनेमसंघ केन्द्रिय उपाध्यक्ष कल्पना पोख्रेल लगायतका नेताहरुको उपस्थितिमा सम्पन्न कार्यक्रममा नेता शेर बहादुर वि.सी. र पत्रकार महासंघ अर्घाखाँचीका अध्यक्ष गणेश खनालले पनि मन्तव्य राख्नुभएको थियो ।
कार्यक्रममा बोल्दै नेता वि.सी.ले नेपालमा संघियता अभिसाप भइसकेको जिकिर गर्नुभएको छ ।
संघियता खारेजी, प्रतिगमनको पूर्ण परास्ती र राजनितिक स्थायित्व भएमात्रै मुलुकको विकासले गति लिने उहाँको तर्क छ ।
बैशाख २३ गते, २०८२ मा प्रकाशित
