आश्विन २७ गते, २०८२ मा प्रकाशित
गोपाल प्रसाद भट्टराई , अर्घाखाँची ।
असौज–२६,अर्घाखाँची जेनजी पुस्ता अर्घाखाँचीको अगुवाईमा बागी खोला सफाई अभियान सुरु भएको छ ।
सन्धिखर्कको मुटुमा रहेको बागीखोलामा थुप्रिएको फोहोरको डङ्गुरले शहरनै कु–रुप बनेको भन्दै जेनजी अर्घाखाँचीले शनिबारदेखि खोला सफाई अभियानको सुरुवात गरेका हुन् ।
पहिले–पहिले कन्चन बग्ने खोला तथा त्रिवेणी धाममा मानिसहरु स्नान गर्ने र पौडी खेल्ने जस्ता गतिविधि गर्ने ठाउँ अहिले फोहोरले भरिंदा नाक थुनेर हिड्नुपर्ने अवस्था आएको जेनजीको भनाई छ ।
जेनजी अर्घाखाँचीका सम्पर्क व्यक्ति भगवत भुसालको नेतृत्वमा आयोजित बागीखोला सफाई अभियानको पहिलो दिन शनिबार बागीखोला र त्रिवेणीधाम परिसरमा युवाहरुले सरसफाई गरेका छन् ।
वाताबरणिय स्वच्छता र सुन्दरता कायम राख्न आफैबाट सुरु गर्ने र समाजमा सचेतना फैलाउने उद्देश्यका साथ अभियान थालिएको सम्पर्क व्यक्ति भुसालको भनाई छ ।
शनिबारबाट सुरु भएको यो अभियानलाई निरन्तरता दिने र वातावरणीय स्वच्छता कायम राख्न र अन्य सामाजिक काम गर्न नियमित लाग्ने प्रतिवद्धता समेत जेनजीहरुले व्यक्त गरेका छन् ।
सफाई अभियानमा सहभागी जेनजीहरूले खोलामा फालिएका फोहरहरू संकलन गरी व्यवस्थापन गरेका छन् ।
जेनजी अर्घाखाँचीको एक समूहले केही दिन अगाडि सन्धिखर्क बजार एरियामा रहेका सडकका खाल्डा–खुल्डी पुर्ने र सडक सफाई गर्ने कार्य समेत गरेका थिए ।
अन्य समाचारहरु
