पौष १२ गते, २०८२ मा प्रकाशित
नेभ्ला अर्घाखाँचीको ११औँ जिल्ला अधिवेशन सम्पन्न, नयाँ नेतृत्व चयनसहित पशुपालन तथा पशुस्वास्थ्य सेवा सुदृढीकरणको कार्यदिशा तय**
-केशब पन्थी ,अर्घाखाँची अर्घाखाँची डटकम ।
अर्घाखाँची — नेपाल पाराभेटेरिनरी एण्ड लाइभस्टक एसोसिएसन (नेभ्ला) अर्घाखाँचीको ११औँ जिल्ला अधिवेशन आज सफलतापूर्वक सम्पन्न भएको छ।
अधिवेशनले संगठनको नयाँ नेतृत्व चयन गर्नुका साथै आगामी कार्यकालका लागि नीति, कार्यक्रम र प्राथमिक कार्यदिशा निर्धारण गरेको छ।
अधिवेशन निवर्तमान जिल्ला अध्यक्ष योगेन्द्र प्रसाद मरासिनीको अध्यक्षता तथा नेभ्ला केन्द्रीय उपाध्यक्ष एवं लुम्बिनी प्रदेश संयोजक हुमाकान्त पाण्डेयको प्रमुख आतिथ्यतामा सम्पन्न भएको हो। कार्यक्रममा जिल्लाभरका पाराभेटेरिनरी, पशुपालन तथा पशुस्वास्थ्य क्षेत्रमा क्रियाशील सदस्यहरूको उल्लेखनीय उपस्थिति रहेको थियो।
उद्घाटन सत्रलाई सम्बोधन गर्दै प्रमुख अतिथि पाण्डेयले पशुपालन र पशुस्वास्थ्य सेवा ग्रामीण तथा राष्ट्रिय अर्थतन्त्रको महत्वपूर्ण आधारस्तम्भ भएको उल्लेख गर्नुभयो। उहाँले पाराभेटेरिनरी जनशक्तिको क्षमता अभिवृद्धि, पेशागत मर्यादा कायम, अधिकार संरक्षण तथा सेवा विस्तारलाई संस्थागत रूपमा अघि बढाउन संगठनलाई थप एकताबद्ध र सशक्त बनाइनुपर्नेमा जोड दिनुभयो। लुम्बिनी प्रदेशमा पशुपालन व्यवसायको प्रवर्द्धनमा नेभ्लाको भूमिका प्रभावकारी रहेको उहाँको भनाइ थियो।
कार्यक्रममा निवर्तमान अध्यक्ष योगेन्द्र प्रसाद मरासिनीले आफ्नो कार्यकालमा सम्पन्न संगठनात्मक गतिविधि, तालिम तथा समन्वयका कार्यहरूको समीक्षा प्रस्तुत गर्नुभयो। उहाँले संगठनलाई व्यवस्थित, अनुशासित र सक्रिय बनाउने प्रयास गरिएको उल्लेख गर्दै नवनिर्वाचित नेतृत्वलाई सदस्यहरूको हकहित, क्षमता विकास र पेशागत सुरक्षालाई प्राथमिकतामा राखेर काम गर्न सुझाव दिनुभयो।
अधिवेशनको बन्दसत्रले सर्वसम्मत रूपमा ११ सदस्यीय जिल्ला कार्यसमिति चयन गरेको छ। नवनिर्वाचित कार्यसमितिको अध्यक्षमा रुक्मागत भट्टराई, उपाध्यक्षमा दिपक खनाल, सचिवमा चेतनारायण पाण्डे, सह–सचिवमा श्रीजना सुनार तथा कोषाध्यक्षमा प्रकाश खनाल चयन हुनुभएको छ। अन्य सदस्यहरू सहित पूर्ण जिल्ला कार्यसमिति गठनसँगै अधिवेशन सम्पन्न भएको हो।
यसैगरी, अधिवेशनले केन्द्रीय प्रतिनिधिहरूमा उमनाथ पन्थी, योगेन्द्र प्रसाद मरासिनी, हुमकान्त बंजाडे, नारायण न्यौपाने र राधा नेपाली लाई चयन गरेको छ। चयन भएका प्रतिनिधिहरूले आगामी केन्द्रीय अधिवेशन तथा नीति निर्माण प्रक्रियामा अर्घाखाँची जिल्लाको प्रतिनिधित्व गर्नेछन्।
अधिवेशनमा पशुपालन तथा पशुस्वास्थ्य क्षेत्रमा विद्यमान समस्या, चुनौती र सम्भावनाका विषयमा गहन छलफल गरिएको थियो। विशेषतः पाराभेटेरिनरी पेशाको पहिचान, सेवाको गुणस्तर अभिवृद्धि, तालिम तथा रोजगारीका अवसर विस्तार, स्थानीय तहसँगको समन्वय, रोग नियन्त्रण तथा पशुपालन व्यवसाय प्रवर्द्धनका विषयहरूलाई प्राथमिक एजेन्डाका रूपमा उठान गरिएको थियो।
समापन सत्रमा नवनिर्वाचित अध्यक्ष रुक्मागत भट्टराईले सम्पूर्ण सदस्यहरूको विश्वासप्रति आभार व्यक्त गर्दै संगठनलाई अझ सुदृढ, पारदर्शी र परिणाममुखी बनाउने प्रतिबद्धता व्यक्त गर्नुभयो। उहाँले सदस्यहरूको क्षमता विकास, पेशागत सुरक्षाको प्रत्याभूति तथा गुणस्तरीय पशुस्वास्थ्य सेवा प्रवाहलाई आगामी कार्यकालको मुख्य प्राथमिकता बनाइने स्पष्ट पार्नुभयो।
११औँ जिल्ला अधिवेशनले नेभ्ला अर्घाखाँचीलाई संस्थागत रूपमा थप सशक्त, उत्तरदायी र प्रभावकारी बनाउने आधार तयार गरेको निष्कर्ष निकालिएको छ।
थप तस्बिर :
अन्य समाचारहरु
